zero media family planning adv

येँ महानगरया झिलिमिली : ७५ लखया मत

नेवा: अनलाइन न्युज – ललेन्द्र शाक्य | २०७७ आषाढ १४, आइतबार १३:२९:३५

येँ महानगरपालिकां रात्रीकालीन सहरी सौन्दर्य ज्याझ्वःया नमूना परीक्षण न्ह्याकूगु दु ।

थुकिया सुरुवात माइतीघर मण्डलापाखें याःगु दु । माइतीघर मण्डलाय् आः सनिलया इलय् थ्यनीबलय् झिलिमिली खनेदइगु जूगु दु । उगु क्षेत्रय् एलइडी कलर पाइप लाइट जडान याःगु दु ।

येँ महानगरपालिकाया सहसचिव राजेश्वर ज्ञवालीं सहरया सौन्दर्य अप्वयेकेत येँ महानगरपालिकां बहनी झिलिमिली खनेदइगु एलइडी कलर पाइप लाइट जडानया ज्याझ्वः न्ह्यःने यंकाःगु धाःगु दु ।

दकले अप्वः चहःपहः जुइगु व वयेवने नं अप्वः जुइगु माइतीघर मण्डलाय् नमूना परीक्षणया रुपं झिलिमिली ज्याझ्वः न्ह्यःने यंकागु ज्ञवालीं धाःगु दु । वं धाःगु दु, हलिंया थीथी सहरय् सहरया रात्रीकालीन जीवनयात जीवन्त यायेगु थुज्वःगु ज्याझ्वःयात प्राथमिकताय् तःगु खनेदु । जिमिसं नं रात्रीकालीन सहरया सौन्दर्य अप्वयेकेत थथे यानागु खः ।

वइगु दिनय् अप्वः चहःपहः जुइगु, धार्मिक व पर्यटकीय स्थल व सम्पदा धलखय् सूचीकृत थासय् छसिंकथं थुज्वःगु मत जडान यानाः यंकेगु ज्ञवालीं धाःगु दु । महानगरया छुं थासय् महानगर थःम्हेस्यां व छुं छुं थासय् नीजि क्षेत्रया सामाजिक उत्तरदायित्वया रुपं मत जडान यायेगु ज्याझ्वःयात निरन्तरता बिइगु योजना दु ।

ज्याझ्वलं रात्रीकालीन व्यवसायपाखें अर्थतन्त्रयात छुं हदतक चलायमान यायेत टेवा जुइगु आशा याःगु दु । ज्ञवालीं थुकिं म्हो खर्चय् हे रात्रीकालीन चहःपहः अप्वइगु व फुटपाथ पसःयात न्यूनीकरण यायेगु छुं हदतक ग्वाहालि जुइगु धाःगु दु ।

बुलुहुँ न्हूसतक, दरबारमार्ग, थमेल लिसेंया क्षेत्रय् नं थुज्वःगु मत जडान यायेगु जानकरी बिसें ज्ञवालीं वइगु आर्थिक दँया नितिं रंगीचंगी मत जडानया नितिं थ्यंमथ्यं ७५ लख बजेट विनियोजन याःगु जानकारी ब्यूगु दु ।

ज्ञवालीं धाःगु दु, जिमिसं थीथी संघसंस्थालिसे सहकार्य यानाः नं न्ह्यःने वनेगु सोच दयेकाःगु दु । सहरय् रात्रीकालीन सुरक्षाया नितिं नं थ्व जरुरी जू । सतकय् प्रशस्त जः वयेधुंकाः सीसीटीभी क्यामराया प्रभावकारिता तकं अप्वइ ।

ज्ञवालीं असोज कार्तिक तकया दुने सहरया न्यागू न्हयगू थासय् थुज्वःगु मत जडान यायेगु जानकारी ब्यूगु दु ।

येँ महानगरपालिकां थुगु दँया नीति व ज्याझ्वलय् तकं येँ महानगरपालिका क्षेत्र दुनेया मू चोकतय्के आधुनिक सिग्नलाइज्ड प्रणालीइ आधारित ट्राफिक लाइटत जडान यानाः ट्राफिक व्यवस्थापनयात थप सहज व व्यवस्थित यायेगु, मेयर उज्यालो ज्याझ्वःयात प्रभावकारी रुपं न्ह्यःने यंकेगु, मू चोकय् हाइमास्ट मत जडान यायेगु लिसेंया आज्जु तयातःगु दु ।

Categorized in बजाः