Header Nepal rastra bank Adv

येँ महानगरपालिका १३ वडापाखें गम्भीर ध्यानाकर्षण

नेवा: अनलाइन न्युज – ललेन्द्र शाक्य | २०७९ श्रावण २०, शुक्रबार १३:१९:०२

वंगु छुं दिं न्ह्यःनिसें सामाजिक संजाल व मेमेगु संचारमाध्यमय् येँ महानगरपालिका १३ वडा ज्याकुथिया जनप्रतिनिधि व कर्मचारीपिनिगु विषयस चरित्र हत्या जुइगु कथं अनर्गल प्रचारप्रसार जुयाच्वंगुयात कयाः येँ महानगरपालिका १३ वडा ज्याकुथिया गम्भीर ध्यानाकर्षण जूगु उगु वडां जानकारी ब्यूगु दु । उगु विषयस आम संचारकःमि, १३ वडाया स्थानीयबासी व सर्वसाधारणपिन्त सत्यतथ्यबारे जानकारी बिइत उगु वडा छगू प्रेस विज्ञप्ति सार्वजनिक याःगु दु ।

बिहिवाः येँ महानगरपालिका १३ वडाया वडाध्यक्ष ध्रुवनारायण मानन्धरं ल्हाःचिं तया सार्वजनिक याःगु प्रेस विज्ञप्तिइ येँ महानगरपालिका १३ वडाय् लाःगु साविक कालिमाति २ क थौंकन्हय् येँ महानगरपालिका १३ कि. नं. ३१४, २४८, १८५ व १८६ क्षे.फ. ०–८–२–०, ०–१–१–१, ०–६–२–०, ०–४–२–० तकं यानाः मुक्कं १–४–३–१ (छगू रोपनी चार आना तिन पैसा एक दाम) जग्गा व उकी दयेकूगु छेँ व लिग नापं यानाः २०७६ असोज ३० गतेत राष्ट्रिय वाणिज्य बैंकपाखें लिलाम जूगुलि उगु ज्याया नितिं बैंक व वित्तीय संस्थाया ऋण असुली नियमावली २०५९  दफा २९ या उपदफा ३ स चलअचल सम्पत्ति लिलाम विक्री यायेन्ह्यः स्थानीय प्रशासनया प्रतिनिधि, जिल्ला मालपोत ज्याकुथिया प्रतिनिधि, स्थानीय निकायया प्रतिनिधिया रोहवरय् ऋण असुली अधिकृतं उज्वःगु चलअचल सम्पत्तिया प्रचलित बजाः मूयात तकं ध्यानय् तयाः मू कायम यायेमालीगु खँ न्ह्यथंसें  अथे चलअचल सम्पत्तिया मू कायम याःबलय् सम्बन्धित विशेषज्ञ तकंया राय कायेफइ धैगु व्यवस्था दूगु खँ न्ह्यथनातःगु दु ।

सार्वजनिक जूगु विज्ञप्तिइ धयातःगु दु, ‘अथेहे, राष्ट्रिय वाणिज्य बैंकया कर्जा असुली कार्यविधि २०७१ दफा ६४.३ स सम्बन्धित वडा ज्याकुथिया प्रतिनिधिया रोहवरय् गोप्य शिलबन्दी खाम चायेकेमाःगु व्यवस्था दु । थथे बैंकं लिलाम याःबलय् लिलाम सम्बन्धी कारवाहीस थुगु येँ महानगरपालिका १३ वडायात सहभागी मयाःसे बैंकया शाखा ज्याकुथि दूगु येँ महानगरपालिका २४ वडाया कर्मचारीया रोहवरय् लिलाम याःगु खनेदु । थुगु सम्बन्धय् उगु छेँ जग्गा दा.खा. यायेगु नितिं मालपोत ज्याकुथि कलंकीपाखें तकंछेँ लँपु सिफारिसया नितिं पौ च्वयाः वःगुलि उगु सम्बन्धय् थुगु वडा ज्याकुथिपाखें मालपोत ज्याकुथियात मिति २०७८ असोज ५ गते च.नं. १३/६५३ च्वयाः छ्वयागुपौया लिसः आःतक वःगु मदुनि ।’

थ्वहे सन्दर्भय् मिति २०७९ असार २७ गते द.नं. सी–५०७६० अख्तियार दुरुपयोग अनुसन्धान आयोग व राष्ट्रिय सतर्कता केन्द्रयात थुगु सम्बन्धय् बैंक व ऋणी निम्हेसिगु हितयात ध्यानय् तयाः उल्लेखित कित्ता छेँ जग्गाया लिलाम सम्बन्धी कारवाही सम्बन्धय् माःगु अनुसन्धान व छानविन यानाः निर्देशन जारी जुइत तकं थुगु वडा ज्याकुथिं पौछ्वयागु व्यहोरा जानकारी बियाच्वना धकाः सार्वजनिक जूगु प्रेस विज्ञप्तिइ न्ह्यथनातःगु दु ।

उगु विषय आः कारवाहीया झ्वलय्दूगु जानकारी बिसें येँ महानगरपालिका १३ वडां निगुलिं सम्मानित निकायपाखें याकनं हे अनुसन्धान क्वचायेकाः माःगु निर्देशन याकनं हे वइगु आशा यानागु दु धकाः प्रेस विज्ञप्तिपाखें धाःगु दु ।

थ्वहे झ्वलय् सम्बन्धित बैंक व लिलाम सकार याःम्ह व्यक्तियात थुगु सम्बन्धय् जानकारी बियाबलय् निजपिं सकारात्मक जुया वःगुलि आः उगु लिलामलिसे असम्बन्धित व्यक्तिपिं तःक्वःमछि वडा ज्याकुथिइ वयाः डर त्रास धम्की बियाः ज्याकुथिया न्हिथंया ज्या व सम्पादनय् तकं पंगः थनेगु कथं क्रियाकलाप जुयाच्वंगु जानकारी बियाच्वना धकाः सार्वजनिक जूगु विज्ञप्तिइ न्ह्यथनातःगु दु ।

अथेहे, प्रेस विज्ञप्तिया दकले लिपांगु लाइनय् नोट कथं राष्ट्रिय वाणिज्य बैंकया वहे ज्याकुथिपाखें १३ वडाय् दूगु मेमेगु छेँ जग्गाया लिलाम सम्बन्धी कारवाहीस धाःसा आःतक नं थुगु वडायात प्रतिनिधि छ्वयाहयेत उगु बैंकपाखें पौ छ्वयाहयाच्वंगु जानकारी नं बियाच्वना धकाः न्ह्यथनातःगु दु ।

Categorized in स्थानिय-समाज