नेवा: अनलाइन न्युज – ललेन्द्र शाक्य | २०७९ आषाढ ७, मंगलबार १५:४४:११

येँ महानगरपालिकाया मेयर बालेन शाह नं दकले न्हापां न्ह्यब्वःगु आर्थिक दँ २०७९÷०८० स घोषणा याःगु येँ दुने बालं तयेगु नितिं कम्पनी लिमिटेडपाखें ज्या यायेमाःगु नीति लितकाःगु दु । थुगु नीतियात कयाः जनस्तरं व महानगरपालिकाया कार्यपालिका दुजःपिन्सं म्हिगः सोमवाः तच्वकं विरोध यायेवं न्हापा गथे खः अथेहे घरबार कर पूसा जक गाःगु कथंया नियमयात निरन्तरता ब्यूगु दु ।

नेपाली कांग्रेस व एमालेया कार्यपालिका दुजःपिन्सं येँ दुने बालं तयेगु नितिं बालं च्वनीपिं व बालं बिइपिनिगु दथुइ कानूनी रुपं सम्झौता यानाः बार्षिक १२ प्रतिशत कर पुलाः वयाच्वंगु खँ न्ह्यथंसें येँ महानगरपालिकां हाकनं थप विशेष कम्पनी लिमिटेडपाखें यायेमाःगु व्यवस्था जनताया नीजि सम्पत्तिया अधिकारय् हस्तक्षेप याःगु धासें विरोध याःगु खः ।

वडाध्यक्षपिन्सं बरु घरबहाल कर म्हयेबलय् घरबहाल गुलि खः उलि तयाः सम्झौता यानातःगु खः कि मखु, कर छलेयायेगु नितिं कर्मचारीपिनिगु मिलोमतो दु कि मदु, थुकियात अनुगमन यानाः ज्या यायेमाःगु खँय् सुझाब ब्यूगु खःसा मेयर शाह नं थथे थःत वःगु सुझाब कथं ज्या यायेगु बचं बिसें थःपिन्सं बालं तयेगु नितिं कम्पनी लिमिटेडपाखें यायेगु नीति लितकयागु खँ तयादीगु खः ।

Categorized in स्थानिय-समाज