nepal investment baink

येँ महानगरं ७१ म्ह प्रधानाध्यापक व ११ म्ह स्रोत शिक्षकया नितिं माग यात दरखास्त

नेवा: अनलाइन न्युज – ललेन्द्र शाक्य | २०८० कार्तिक १७, शुक्रबार १४:०४:०४

येँ महानगरपालिकां प्रधानाध्यापक व स्रोत शिक्षक पदया नितिं दरखासत आह्वान याःगु दु ।

महानगरं थीथी तह यानाः ७१ म्ह प्रधानाध्यापक व ११ म्ह स्रोत शिक्षक नियुक्तिया नितिं दरखास्त आह्वान याःगु खः ।

महानगरपालिकाया शिक्षा अधिकारी सीताराम कोइरालाया कथं न्यादँया नितिं करारय् प्रधानाध्यापक छनोट यायेमाःगु जूगुलिं दरबन्दी मिलान व प्रधानाध्यापक नियुक्तिसम्बन्धी कार्यविधि २०८० कथं दरखास्त आह्वान याःगु खः ।

महानगरं आधारभूत तह १ निसें ५ या नितिं खुम्ह, आधारभूत तह १ निसें ८ या नितिं २२ म्ह व माध्यमिक तहया नितिं ४३ म्ह प्रधानाध्यापकया नितिं दरखास्त आह्वान याःगु दु ।

विद्यालय समायोजन वा थपघट जूसां ल्या थपघट जुइफूगु न्ह्यथंगु दु ।

मंसीर १ गतेतक मंदुपिं उम्मेदवारपिन्सं दरखास्त बिइफइगु जूगु दु । दरखास्त बिइगु नितिं सम्बन्धित तहलय् कम्ती नं न्यादँ स्थायी सेवा अवधि दुम्ह जुइमाः ।

माध्यमिक तहया नितिं निद्वः, आधारभूत १ निसें ८ तहया नितिं झिंन्यासः व आधारभूत १ निसें ५ तहया नितिं द्वःछि परीक्षा शुल्क व महानगरपालिकाय् राजश्व बुझेयाःगु भौचर दुथ्याःगु जुइमाःगु जानकारी ब्यूगु दु ।

महानगरं विद्यालय विकास प्रस्ताव तयारी व प्रस्तुतीकरणया आधारय् प्रधानाध्यापक छनोट यायेगु जानकारी ब्यूगु दु ।

११ म्ह स्रोत शिक्षकया नितिं नं दरखास्त आह्वान

येँ महानगरपालिकां स्रोत शिक्षकया नितिं दरखास्त आह्वान याःगु दु । महानगरपालिकां महानगरपालिकाया शैक्षिक नीति, योजना व कार्यक्रम प्रभावकारी रुपं कार्यान्वयन यानाः विद्यार्थीपिनिगु सिकाई उपलब्धी अभिवृद्धि व गुणस्तर सुधारया नितिं विद्यालययात प्राविधिक ग्वाहालि यायेत स्रोत शिक्षकया आवश्यकता जूगु धासें ११ म्ह स्रोत शिक्षकया नितिं दरखास्त आह्वान याःगु खः ।

महानगरपालिकां अंग्रेजी विषयया नितिं निम्ह, नेपाली विषयया नितिं निम्ह, गणित विषयया नितिं स्वम्ह, सामाजिक विषयया नितिं निम्ह व विज्ञान विषयया नितिं निम्ह स्रोत शिक्षकया नितिं दरखास्त आह्वान याःगु दु ।

स्रोत शिक्षकया नितिं मंसीर १ गतेतक मंदुपिं उम्मेदवारपिन्सं दरखास्त बिइफइ । स्रोत शिक्षकया नितिं लिखित, प्रयोगात्मक व अन्तर्वार्ता जुइसा परीक्षा शुल्क निद्वः तका क्वःछ्यूगु दु ।

मंसीर १८ गते परीक्षा संचालन यायेगु महानगरपालिकां जानकारी ब्यूगु दु ।

Categorized in लजगाः