nepal investment baink

येँ महानगरं माग यात १४५ म्ह शिक्षक

नेवा: अनलाइन न्युज – ललेन्द्र शाक्य | २०७९ माघ ६, शुक्रबार १३:४०:४२

येँ महानगरपालिकां पालिका दुने संचालित सामुदायिक स्कूलया एसईई परीक्षाया लिच्वः सुधार यायेत २छ म्ह शिक्षण सहजकर्ता व १२० म्ह शिक्षण ग्वाहालिमिपिनिगु माग याःगु दु ।

महानगरपालिकाया शिक्षा विभागं सुचं सार्वजनिक यासें शैक्षिक सत्र २०७९ स एसईई परीक्षाय् सहभागी जुइपिं विद्यार्थीपिनिगु अध्ययनय् ग्वाहालि व सहजीकरण यायेत स्कूलय् अनुभवी विज्ञ सहजकर्ता व शिक्षण ग्वाहालिमि माग याःगु जानकारी ब्यूगु दु ।

विभागं उकिया नितिं खुल्ला विज्ञापन याःगु दु । विभागं गणित, विज्ञान, अंग्रेजी, सामाजिक व नेपाली विषयया नितिं न्याम्ह न्याम्ह माग याःगु दुु ।

शिक्षण सहजकर्ताया नितिं विश्वविद्यालयया प्राध्यापक, मावि शिक्षक वा अधिकृतस्तरपाखें अनिवार्य अवकाश जूपिं सम्बन्धित विषयया विज्ञ वा थीथी संघसंस्थाय् ज्या याःपिं कम्ती नं झिदँ अनुभव दुपिं व्यक्तिं न्हयन्हुया दुने आवेदन बिइफइगु व्यवस्था यानातःगु दु ।

अथेहे, विभागं शिक्षण ग्वाहालिमिया नितिं गणित व विज्ञान विषयया नितिं ६०–६० म्ह माग याःगु दु । थुकिया नितिं सम्बन्धित विषयस स्नातक तह उत्तीर्ण यानाः कम्ती नं निदँ शिक्षण अनुभव दुपिं व्यक्तिपिन्सं आवेदन बिइफइगु सार्वजनिक जूगु सुचनाय् न्ह्यथनातःगु दु ।

Categorized in लजगाः