2565 buddha Jayanti ADV

येँ महानगरं नगरवासीया नितिं राहत व सहुलियत ज्याझ्वः हइगु

नेवा: अनलाइन न्युज – ललेन्द्र शाक्य | २०७८ जेठ २५, मंगलबार १३:१७:३०

येँ महानगरपालिकां वइगु असार २ गते च्वनीगु नगरसभाय् नगरबासीपिन्त छुं राहत व सहुलियतया योजना पेस याइगु जूगु दु ।

येँ महानगरपालिकाया प्रमुख विद्यासुन्दर शाक्यं महानगरया प्राथमिकता हाकनं नं स्वास्थ्य क्षेत्रया ज्याझ्वलय् हे केन्द्रीत जुइगु धाःगु दु । संचारकःमिलिसे खँ ल्हासें प्रमुख शाक्यं कोभिड १९ संक्रमणविरुद्ध ल्वायेत रोकथाम व उपचारय् हे ज्याझ्वः केन्द्रीत जुइगु जानकारी ब्यूगु दु ।

थुकिया लिसें महानगरया नीति व ज्याझ्वः दयेकेत ग्वसाः ग्वयेगु वडास्तरीय सहलह ज्याझ्वलय् मेयर लिसें फुक्क सहभागी जुइगु नं शाक्यं जानकारी ब्यूगु दु । नगर क्षेत्रया संक्रमित व कोरोना संक्रमणपाखें सीपिं छेँजःपिन्त छुं ग्वाहालि उपलब्ध याकेगु नं मेयर शाक्यं धाःगु दु ।

येँ महानगरपालिकाया नीति व ज्याझ्वः लिसें बजेट कोरोनाया हुनिं व्यापार व्यवसाय, पेशा, रोजगारीइ लाःगु लिच्वःयात राहत बिइगु कथं वइगु मेयर शाक्यया धापू दु । महानगरया करदातापिन्त लिच्वः स्वयाः ८५ प्रतिशततक कर दस्तुरय् छुट बिइगु कथं ज्याझ्वः वइगु नं मेयर विद्यासुन्दर शाक्यं धाःगु दु ।

Categorized in स्थानिय-समाज