zero media family planning adv

येँ महानगरं आइसोलेसनलिसेंया अस्पताल दयेकेत समित दयेकल

नेवा: अनलाइन न्युज – ललेन्द्र शाक्य | २०७८ बैशाख २१, मंगलबार १०:२२:५८

येँ महानगरपालिकां कोभिड १९ महामारीया नियन्त्रणया नितिं सुविधां जाःगु आइसोलेसनलिसेंया अस्पताल दयेकेगु नितिं पायछिगु प्रस्ताव पेस यायेत वडा ल्याः ३ या नायः दीपक केसीया नायःसुइ न्हयम्ह (७ म्ह) दुजःया समिति नीस्वंगु दु ।

समितिया दुजलय् वडा ल्याः ६ या नायः दीपेन्द्र लामा, ७ या नायः शुद्धकुमार डंगोल, वडा ल्याः २२ या नायः चिनीकाजी महर्जन, ३० या नायः दलबहादुर कार्की, ३१ या नायः नारायण भण्डारी च्वंगु दु ।

येँ महानगरपालिकाया प्रमुख विद्यासुन्दर शाक्यया नायःसुइ सोमवाः च्वंगु ६१ क्वःगु कार्यपालिका बैठकय् कोभिड १९ महामारी व्यवस्थापन सम्बन्धय् सहलह ब्याकाः कोभिड अस्पताल संचालनय् बः ब्यूगु खः ।

समितिं आइसोलेसन संचालन वडा तहपाखें यायेगु कि महानगर तहपाखें यायेगु, ल्वगियात अक्सिजन जक बियाः सामान्य वासः यानाः जिइ कि जटिल स्वास्थ्य समस्या जूपिन्त वासः यायेत माःगु उपकरण लिसेंया उपचार कक्ष दयेकेगु विषयस सिफारिस याइ ।

येँ महानगरपालिकां तर्जुमा याइगु महामारी नियन्त्रण ज्याझ्वलय् डा. गणेश गुरुङ, डा. अर्जुन कार्की, डा. अनुप सुवेदी व डा. शरद वन्तयात स्वास्थ्यविज्ञया रुपं सःतेगु बैठकं निर्णय याःगु दु ।

वहे झ्वलय् वडाध्यक्षपिं दलबहादुर कार्की, नीलकाजी शाक्य, शुद्धकुमार डंगोल, दीपेन्द्र लामा व दीपक केसीपिन्सं महामारी व्यवस्थापन यायेत वडा तहपाखें थाकुयाः वंगु धारणा तःगु खः ।

बैठकं मानव बेचविखन व ओसारपसार नियन्त्रण स्थानीय समिति गथन व व्यवस्थापन सम्बन्धी कार्यविधि २०७८ व छात्रवृत्ति कार्यविधि २०७८ तर्जुमा यायेत सहमति ब्यूगु दु ।

अथेहे, छत्रपाति निःशुल्क चिकित्साल व ब्रम्हकुमारी राजयोग सेवा केन्द्रया भवन नक्सा पास दस्तुर मिनाहा यायेगु निर्णय नं याःगु दु ।

Categorized in स्थानिय-समाज