swastha 3

येँ दे : काठमाण्डौंया म्ये

–लोककवि राजभाई जकःमि

 

झीगु गौरव : झीगु येँ दे : झीगु काठमाण्डौं

संस्कृतिकया जलं झलझल थीगु काठमाण्डौं ।

पाहाँ भाजु – मय्जुपिन्त लसकुस याय्

भिंगु मनं ज्वजलपा – नमस्कार धाय् । धुवा ।

 

लाय्कू, देगः, हिति, पुखू, सतः बहि, बाः

गुलि जक हिसि दु रे येँ देय्या थ्व ख्वाः

वीर पूर्खापिं थें झी नं वीर जुयाः म्वाय्

भिंगु मनं ज्वजलपा – नमस्कार धाय् । १ ।

 

नेपाः देया नुगःचु थ्व महानगर

कला कृतिं भय्भय् ब्युगु महाशहर

स्वयम्भू व पशुपति पुण्य ह्वःगु थाय्

भिंगु मनं ज्वजलपा – नमस्कार धाय् । २ ।

 

झःझः धाःगु झीगु देया विश्व सम्पदां

हलिं न्यंक थ्वयाच्वन नेपालया नां

येँ दे झं हे बांलाकाः झी न्हूगु युगय् न्ह्याय्

भिंगु मनं ज्वजला – नमस्कार धाय् । ३ ।