nepal investment baink

येँय् छेँ दनेबलय् २० प्रतिशत जग्गाय् पार्किङ अनिवार्य

नेवा: अनलाइन न्युज | ने.सं. ११४४ चिल्लाथ्व पुन्हिं (२०८०चैत्र १२) सोमवाः

येँ महानगरपालिकां वइगु बैशाख १ गतेनिसें ४ आनासिबें अप्वः जग्गाय् छेँ दयेकेबलय् २० प्रतिशत क्षेत्रय् अनिवार्य पार्किङ दयेकेमाःगु नियम दयेकूगु दु ।

महानगरं भवन निर्माण मापदण्ड २०८० व भवनसंहिता लागु यासें नक्सा पासय् पार्किङ लिसेंया नियमत दयेकूगु खः । थ्व मापदण्ड बैशाख १ गतेनिसें लागु जुइ ।

तर, पुरातात्विक महत्वया संरक्षित स्मारक उपक्षेत्रय् धाःसा थ्व नियम लागु मजुइगु भवनसंहिताय् न्ह्यथनातःगु दु । पार्किङया नितिं सतकया क्षेत्राधिकार दुने मलाइगु कथं सेड ब्याकय् लाःगु जग्गाया क्षेत्रफल तकं छ्यलाबुला यायेफइ ।

लिसें महानगरं भवनया नक्सायात निगू चरणय् स्वीकृत याइगु जूगु दु । सुरक्षित भवन निर्माणया नितिं प्लिन्थ लेभलतकया निर्माण न्हापांगु चरणय् व थ्वसिबें च्वय् च्वंगु भागया मेगु चरणय् नक्सा स्वीकृत यायेगु महानगरं निर्णय याःगु खः ।

सहरी व्यवस्थापन विभागया बरिष्ठ इन्जीनियर जीवन रेग्मीया कथं भवन मापदण्ड व संहिताय् दुने सहरी क्षेत्रय् १ तला व पिने वडाय् २ तला बेसमेन्ट दयेके फइ ।

रेग्मीं धाःगु दु, “१७ मिटर (अधिकतम ५ तला) सिबें तःजाःगु वा १० हजार स्क्वायरफिटसिबें अप्वः क्षेत्रफल दूगु भवन दयेकेबलय् अनिवार्य भूप्राविधिक अनुसन्धान (जिओ टेक्निकल इन्भेस्टिगेसन) यायेमाःगु व्यवस्था याःगु दु ।”

५ हजार वर्गफिटतक क्षेत्रफल दूगु भवनया नक्सा वडापाखें हे व थ्वसिबें अप्वः क्षेत्रफल दूगु भवनया नक्सा महानगरपाखें स्वीकृति कायेमालीगु जूगु दु । १० हजार वर्गफिटसिबें अप्वः क्षेत्रफ ल दूगु भवन मूल्यांकनपाखें स्वीकृत यायेगु संहिताय् न्ह्यथनातःगु दु ।

सरकारी, अर्धसरकारी, बैंक व वित्तीय संस्था, शैक्षिक संस्था, स्वास्थ्य भवन, संयुक्त भवन, व्यापारिक भवन निर्माण यायेबलय् अनिवार्य रुपं आकस्मिक विपद् व्यवस्थापन योजना तकं पेस यायेमालीगु जूगु दु । महानगरया सहरी व्यवस्थापन विभागं वडा सचिव व वडाया इन्जीनियरया नितिं अभिमुखीकरण तकं याकूगु दु ।

संहिताय् धयातःगु दु, “सहर निर्माण यायेगु झ्वलय् आः खुल्ला थासय् संरचना मदयेकेगु नीति अवलम्बन यायेमाःगु अवस्था दु ।”
महानगरपालिकां भवन निर्माण मापदण्ड २०८० व भवन निर्माण सम्बन्धी कार्यविधि २०७५ य् न्हापांगु संशोधन यासें थ्व मापदण्ड व संहिता जारी याःगु खः ।

भवन व्यवस्थापन समितिया कजि हिरालाल तण्डरकारया कथं सहरय् ब्वलनीगु न्हूगु कथंया विपतया सामना यायेत थ्व संशोधन याःगु खः ।

भवन व सतक संजाल लिसेंया पूर्वाधार सम्बन्धित विवरण अद्यावधिक यायेगु व छेँ ल्याः वितरण ययोगु योजना कथं तकं ज्या जुयाचवंगु सहरी व्यवस्थापन विभागया प्रमुख अर्चना शाक्य श्रेष्ठं धाःगु दु ।

भवन निर्माण मापदण्डया उपक्षेत्र छु गन ?

भवन निर्माण मापदण्डं पुलांगु सहरी क्षेत्रयात थाय्या प्रकृतियात आधार दयेकाः ४ उपक्षेत्र क्वःछ्यूगु दु । थुकी न्हापांगु संरक्षित स्मारक उपक्षेत्र खः ।

पुरातात्विक सांस्कृतिक सम्पदा दूगु न्हयगू वडा त ( ६, ८, १५, १९, २३, २४ व २५) थुकी लाः । कुमारी रथयात्रा जुइगु लँपु लिसे सम्बन्धित न्हयगू वडात (१२, १७, १८, २१, २४, २५ व २७) यात संरक्षित उपक्षेत्रय् तःगु दु ।

अथेहे, पुलांगु बसोबास दूगु १४ गू वडात (११ निसें २७ वडात) यात मिश्रित पुलांगु बसोबास उपक्षेत्रय् तःगु दु ।

थ्वहे झ्वलय् हाँडीगांया प्राचीनता बचेयायेत थुगु क्षेत्रयात हाँडीगां संरक्षित उपक्षेत्रय् तःगु संहिताय् न्ह्यथनातःगु दु ।

अथेहे, आवासीय क्षेत्रयात ४ उपक्षेत्रय् ब्वथःगु दु । न्हापांगु, व्यापारिक उपक्षेत्र खः । निगूगु, घनाबस्ती मिश्रित बसोबास उपक्षेत्र खः । थुकी १३ गू वडात (१, ११,१२? १७, १८, १९, २०, २१, २६, २७, २८, २९ व ३०) यात तःगु दु ।

स्वंगूगु, मेमेगु अवासीय उपक्षेत्र खः । थुकी १६ गू वडात (१, २, ३, ४, ५, ६, ७, ८, ९, १०, १३, १४, १५, १६, २१ व ३२) यात तःगु दु ।

प्यंगूगु, योजनाबद्ध आवासीय उपक्षेत्र तःगु दु । थुकी वडा ल्याः ६ या बागमती नगर योजना, वडा ल्याः ९ या तिलगंगा जग्गा विकास, वडा ल्याः १४ या कुलेश्वर जग्गा विकास, वडा ल्याः १५ व १६ य् लाःगु चःमति व नयाँबजार जग्गा विकास व वडा ल्याः ३२ य् लाःगु मनोहरा व सिनामंगल जग्गा विकास ज्याझ्वः दुनेया क्षेत्रयात तःगु दु ।

पार्किङ, सेडब्याक, (फ्लो एरिया रेसियो) फार लगायतया सुविधा उपक्षेत्रया आधारय् ब्यागलं ब्यागलं दु ।

भवन नक्सा स्वीकृत अनलाइन प्रणाली

येँ महानगरपालिकाय् इलेक्ट्रोनिक बिल्डिङ, परमिट सिस्टम (ई बीपीएस) पाखें भवन निर्माणया नितिं आवेदन बिइफइगु व्यवस्था लागु जुयाः वयाच्वंगु दु । थुगु प्रणालीपाखें आवेदन बिइधुंकाः बायो मेट्रिक यायेत बाहेक मेमेगु छं नं प्रक्रियाया नितिं ज्याकुथिइ वनेम्वाः ।

२०७० भाद्र १७ गतेनिसें महानगरं भ्वःँया लिसें अनलाइन प्रणाली संचालन न्ह्याकूगु खः । प्रणालीया आरम्भ इलय् फाइलय् दूगु भ्वँ व प्रणाली ज्वंकाः प्रक्रिया न्ह्यःने यंकीगु खः । प्रणालीया अंक परिपक्व जुइधुंकूगुलिं प्रणाली व भ्वँया फाइल निगुलिं प्रक्रियाया अभ्यास याःगु खः ।

प्रणालीयात विकास यासें विद्युतीय ल्हाःचिं, अनलाइन राजस्व दाखिला, गुनासो व मर्का सम्बन्धी उजुरीलिसेंया विशेषता जुइधुंकाः वंगु २०८० जेठ १ गतेनिसें फाइल ज्वनाः वयेम्वाःगु कथं प्रणालीयात अद्यावधिक याःगु खः ।

Categorized in स्थानिय-समाज