prabhu baink new

येँया ७ गू वडा कोरोना ...हटस्पट...

नेवा: अनलाइन न्युज – ललेन्द्र शाक्य | २०७७ भाद्र २१, आइतबार १४:४९:५५

स्वनिगलय् कोभिड १९ या संक्रमित ल्याः ७ ,०३८ म्ह थ्यंगु दु । झिन्हुया दुने स्वनिगलय् दोब्बर संक्रमित थप जूगु दु । भाद्र ८ गते स्वनिगःया स्वंगुलिं जिल्लाय् ३,४८६ म्ह संक्रमित जूगु खः ।

राजधानी येँय् न्हिथं संक्रमित थप जुइगु ५०० थ्यंनेत्यंबलय् स्वंगुलिं तहया सरकार सक्रिय जूगु खः । अझ स्वनिगःया स्थानीय तहया न्यागू वडाया प्रत्येक वडाय् संक्रमित जूपिं थ्यंमथ्यं २०० म्ह थ्यंगु दु । संक्रमण समुदायस लक्षित जुइधुंकाः स्थानीय तहया भूमिका महत्वपूर्ण जुइगु धारणा तःम्ह जनस्वास्थ्यविद् डा. शरद वन्तं नियन्त्रणया नितिं नागरिक, जनप्रतिनिधि, स्वास्थ्यकःमिपिनिगु ग्वाहालि आवश्यक जुइगु धाःगु खः ।

कोभिड १९ उच्च स्तरीय समितिं बाँडफाँड याःगु जिम्मेवारी कथं संघीय सरकारं लक्षण खनेदुपिं संक्रमितया वासः यायेगु व्यवस्थापन याइ । प्रदेशं स्थानीय तहलिसेया समन्वयस लक्षण खनेमदुपिं ल्वगिपिनिगु व्यवस्थापन यानाः वयाच्वंगु दु । स्थानीय तह नं कन्ट्याक्ट ट्रेसिंगयात प्रभावकारी यायेगु जिम्मेवारी काःगु दु ।

येँलिसें स्वनिगःया स्वंगुलिं जिल्लाय् संक्रमण अप्वयेधुंकाः उपत्यका नगरपालिका फोरमया बैठक च्वनाः शैया व्यवस्थापनया ज्यायात तीव्रता ब्यूगु दु ।

फोरमं प्रदेशलिसेया समन्वयस ७,००० शैया व्यवस्थापन यायेत्यंगु येँ महानगरपालिकाया प्रवक्ता ईश्वरमान डंगोलं धाःगु दु ।

तर व्यवस्थापन जुइमफुनिगु अवस्थाय् संक्रमित अप्वयाः च्वंगु दु । व येँ महानगरपालिकाया ७ गू वडाय् जक द्वःछिसिबें अप्वः सक्रिय संक्रमित दु । लक्षणविहीन संक्रमिया ल्याः अप्वः जूगुलिं नं स्थानीय तहया नितिं संक्रमित व्यवस्थापन चुनौतीपूर्ण जूगु दु । नेपालय् थ्यंमथ्यं ७५ प्रतिशत लक्षणविहीन संक्रमित दु ।

येँया कोभिड १९ हटस्पट

महानगरपालिकाया स्वास्थ्य महाशाखाया कथं ७ गू वडा संक्रमणया ...हटस्पट...पहिचान याःगु दु । १०० म्हसिबें अप्वः संक्रमित दूगु वडायात हटस्पटय् तःगु महानगरपालिकाया स्वास्थ्इ महाशाखाया सम्पर्क व्यक्ति ज्ञानबहादुर ओलीं जानकारी ब्यूगु दु ।

वडा ल्याः ३२ कोटेश्वर व वडा ल्याः १६ बालाजुइ २०० म्हसिबें अप्वः संक्रमितया पुष्टि जुइधुंकूगु दु । वडा ल्याः २७ महाबौद्ध व वडा ल्याः ३ महाराजगञ्जय् थ्यंमथ्यं १८५ म्ह संक्रमित दु । वडा ल्याः १४ कलंकी व वडा ल्याः १३ कालिमातिइ थ्यंमथ्यं १३५ म्ह संक्रमित पुष्टि जूगु महानगरपालिकां जानकारी ब्यूगु दु । वडा ल्याः २८ अन्तर्गत लाःगु बागबजारय् १०३ म्ह संक्रमित दु ।

महानगरया प्रवक्ता ईश्वरमान डंगोलं संक्रमित ल्याः अप्वः जूगु क्षेत्रय् प्राथमिकता तयाः कन्ट्याक्ट टे्रसिंग जुयाच्वंगु जानकारी ब्यूगु दु । प्रवक्ता डंगोलया कथं शुक्रवाः जक संक्रमितया सम्पर्कय् वःपिं १९५ म्हेसित पहिचान याःगु दु । तर महानगरया उगु कुतः धाःसा पर्याप्त खनेमदु ।

येँय् जक शुक्रवाः ३८६ म्ह संक्रमित पुष्टि जूगु दु । संक्रमितया सम्पर्कय् वःपिं कम्ती नं द्वःछिम्ह दयेफु । तर न्हिथं १०० निसें २ संक्रमिया सम्पर्कय् वःम्ह व्यक्ति पहिचान याःगु दु ।

महानगरं कन्ट्याक्ट ट्रेसिंगया नितिं १० गू पुचः खटेयाःगु दु । पुचलं आःतक ६ हजार ४१३ म्हेसित ब्यागलं तयाः पीसीआर परीक्षण याःगु दु । प्रवक्ता डंगोलं धाःगु दु, संक्रमित पुष्टि जुइधुंकाः सम्पर्कय् वःपिनिगु मालेगु ज्या जुइ, पहिचान यानाः ब्यागलं तयेगु जुइ व निश्चित ई क्वःछिनाः पीसीआर परीक्षण यायेगु जुइ ।

उगु ज्याया नितिं जनप्रतिनिनिध परिचालन याःगु दु । डंगोलं धाःगु दु, स्वास्थ्य उपचार व परामर्शया नितिं शहरी स्वास्थ्य क्लिनिक दु ।

(थौं आइतवाः पिदंगु गोरखापत्र न्हिपौपाखें)

Categorized in पत्रपत्रिका