1142 nhoo dan adv

येँया हनुमानध्वाखाय् क्वचाल किपूया १२ दँया गथु प्याखं

भैरव नाचया गुरु मालीं ल्यंदूगु २५ लख तका दां इलं मवल धाःसा प्याखं न्ह्यब्वयेगुलि समस्या वइगु खँ नं धयादीगु दु । वय्कलं धयादी, ‘प्रत्येक प्याखंया नितिं पंचबलिया नितिं जक ७०–८० हजार तका दां खर्चया आवश्यकता जू । प्याखनय् खटे जुइपिं २५० म्ह गुथ्याःपिन्त तकं भ्वय् नकेत कम्ती नं २ लख तका दांया आवश्यक जू ।’

येँया बसन्तपुरय् च्वंगु हनुमानध्वाखा लायकू लागाय् किपूया १२ दँया भैरव प्याख (गथु प्याखं) क्यनेज्या क्वचाःगु दु । तान्त्रिक विधिकथं न्ह्यब्वइगु थुगु प्याखं स्वयेत बुधवाः येँ, यल, ख्वपनापं स्वनिगःया थीथी थासय् च्वंपिं मनूतय्गु हुलमुल जूगु खः ।

थुगु प्याखं न्ह्यब्वय्गु नितिं किपूया द्यःछेँपाखें ११ म्ह द्यःप्याखंम्वःपिं, ५ म्ह गुरु, ४ म्ह नायः व २ म्ह थकालीपिं येँया हनुमानध्वाखाय् थ्यंकूगु खःसा सकलसित मंगलवाः पचलीभैरव गुथिया पाखें भव्य लसकुस याःगु खः ।

युवा हिन्दु महासंघया न्ह्यलुवाय् प्याखं पुचःपिन्त माःगु व्यवस्थापन याःगु खः । न्हापांगु दिं मंगलवाः प्याखनय् दुथ्याःपिं फुक्क देवगणपिन्सं येँ महानगरपालिका–२१ वडाय् च्वंगु ज्याबहाःया द्यःछेँय् च्वनाः ख्वाःपाः, क्लेबर वसः, तिसा वसः पुनाः शक्तिधारण याःगु खः । गुकिया नितिं गणेश जुयाः प्याखं ल्हुइम्ह देवगणं मेमेपिं देवगण, गुरु, नायःपिन्त मोहनी सिन्हः तिकाब्यूगु खः ।

द्यःछेँय् सिद्धिपूजा यायेधुंकाः सांस्कृतिक बाजागाजाया लिसें जोशी देगः, चिकंमू, मरु जुयाः लायकू लागाय् थ्यंकूगु खः । नगर परिक्रमाया झ्वलय् देवगणं लायकूया हनुमान ध्वाखा न्ह्यःनेया उमामहेश्वर देगलय् मंकाः प्याखं न्ह्यब्वःगु खः । गुकियात नेपालभाषां ‘द्यः ल्हाःगु’ धाइगु खः । वधुंकाः भैरवं कालरात्री प्याखं न्ह्यब्वःगु खः । फुक्क देवगणं गुरुपिन्सं हाःगु तान्त्रिक म्येया तालय् प्याखंपाखें ध्यान साधना याःगु खः । दकलें लिपा भैरवयात हाकुम्ह दुगु बलि बियाः धुम्बा सिम्बापिन्सं प्याखंलिसें फुक्क देवगणपिन्त सगं ब्यूगु खः ।

बुधवाः गणेश, ब्रम्हायणी, रुद्रायणी, बैष्णवी, कुमारी, बाराही, कालीका, इन्द्रायणी, सिंहिनी व बघिनीं प्याखं न्ह्यब्वःगु खः ।

कालीं दैत्ययात बघ याःगु लूयात प्याखंपाखें न्ह्यब्वःगु खः । बाराहीपाखें प्याखंलिसें मेमेपिं देवगण व गुरुपिन्त सगः व पाःताः ख्वलां थ्वँ त्वकूगु खः । नेपालभाषां पाःताः धायेबलय् मनूया छ्यंया क्वँय् आकारया विशेष कथंया ख्वला खः, थुकी थ्वँ तयाः त्वंकीगु खः । थुगु पाःताः ख्वलायात गुलिं गुलिं मनूतसें धात्थेंया हे मनूया छ्यंया ख्वला खः धकाः धायेगु याः ।

प्याखंया झ्वलय् मोहनी सिन्हः तीधुंकाः प्याखं क्वमचाःतले ख्वाः सिले मज्यूगु, समेबजि बाहेक जा व मेमेगु नसाज्वलं नयेमज्यूगु मान्यता  दूगु किपूया भैरव नाच (गथुप्याखं)या गुरु राजकुमार मालीं धयादिल ।

गुरु राजकुमार मालीं धयादी, ‘प्याखं महाभारत, भैरवया बाखनय् आधारित खः । २ लख तका दां ऋण कयाः थुगु प्याखं संचालन यानागु खः । थुगु प्याखं न्ह्यब्वयेगु नितिं निक्वःगु किस्ताबापत वयेमाःगु रकम वःगु मदु । ख्वाःपाः पुयाः स्वक्वः व तुयूगु जामा जक सिनाः खुक्वः प्याखं न्ह्यब्वयेगु झ्वलय् २४ लख तका दां खर्च जुइधुंकूगु दु । निक्वःगु किस्ताया रकम निकासाया नितिं कौसी तोसाखानाय् पौ छ्वयेधुनागु दु ।’

भैरव नाचया गुरु मालीं ल्यंदूगु २५ लख तका दां इलं मवल धाःसा प्याखं न्ह्यब्वयेगुलि समस्या वइगु खँ नं धयादीगु दु । वय्कलं धयादी, ‘प्रत्येक प्याखंया नितिं पंचबलिया नितिं जक ७०–८० हजार तका दां खर्चया आवश्यकता जू । प्याखनय् खटे जुइपिं २५० म्ह गुथ्याःपिन्त तकं भ्वय् नकेत कम्ती नं २ लख तका दांया आवश्यक जू ।’

किपूया १ वडा सतःक्वय्, पांगां, नगां, यलया लायकू व प्याखंया नितिं निम्तो ब्यूगु थासय् वनाः प्याखं न्ह्यब्वयेगु ल्यं हे दनि । प्याखंया नितिं माःगु जेनेरेटर, मत, लः, मेच इत्यादी हलंज्वलंया व्यवस्थापन युवा हिन्दु महासंघं याःगु खः ।

महासंघया नायः राजन महर्जनं हनुमानध्वाखा लायकू संग्रहालयं व्यवस्थापनया जिम्मा महासंघयात ब्यूसां नं व्यवस्थापनया नितिं माःगु खर्च मब्यूगु धाःगु दु । नायः महर्जनं धयादी, ‘देवगणपिन्त च्वनेगु, देनेगु नापंया माःगु हलंज्वलं जिमिसं उपलब्ध यानाबियागु दु ।’