zero media family planning adv

येँया सतुंगलं ६ लख थान मास्क बरामद

नेवा: अनलाइन न्युज | २०७६ चैत्र ३, सोमबार ११:३८:२४

येँया सतुंगलं थ्यंमथ्यं ६ लख थान सर्जिकल मास्क बरामद याःगु दु । चन्द्रागिरी नगरपालिका–१० वडा विष्णुदेवीइ च्वंगु छगू गोदामय् तयातःगु मास्क प्रहरीं बरामद याःगु खः ।

थ्वसिबें न्ह्यः कपनं १ लख ६८ हजार थान व डल्लुं ७८ हजार थान मास्क बरामद याःगु खः । शनिवाः थुने येँपाखें ८ लख ४० हजार थान मास्क प्रहरीं बरामद यायेधुंकूगु दु ।

आइतवाः सनिलय् सतुंगःया रोहित श्रेष्ठया छेँया गोदामय् सुचुकाः तःगु मास्क लुयावयेधुंकाः स्थानीय प्रशासनं सिलबन्दी याःगु खः । सोमवाः सुथय् चायेकाः ल्याःखाःबलय् १७५ पाः बोराय् ६ लखसिबें अप्वः मास्क दूगु सीदूगु खः ।

थ्वसिबें न्ह्यः प्रहरीं कपनया मिलन चोकं १ लख ६८ हजार थान मास्कलिसें ६ म्हेसित गिरफ्तार याःगु खः । गिरफ्तारीइ लाःपिंमध्ये छम्ह भारतीय नागरिक तकं लाःगु खः ।

गिरफ्तारीइ लाःपिं येँ महानगरपालिका २३ वडा छेँ दुम्ह ३४ दँया सुरज गोयल, भारतया राजस्थान छेँ जुयाः बागबजाः च्वनाच्वंम्ह २७ दँया सुवास महेश्वरी, कपनय् पोते पसः तयाः वयाच्वंम्ह २६ दँया अजिम बबस मिया व मिलनचोक प्लास्टिक सप्लायर्सया २४ दँया संजनकुमार रेग्मी खः । कपनं प्रहरीं बा७च ७२६३ ल्याःया गाडी, गाडी चालक व हेल्परयात तकं नियन्त्रणय् काःगु खः ।

डल्लु, कपन व सतुंगलय् मास्क सुचुकाः तःपिनिगु दथुइ संजाल दूगु आशंकाय् अनुसन्धान न्ह्यानाच्वंगु प्रहरीं जानकारी ब्यूगु दु ।

नेपालय् नं कोरोना भाइरस संक्रमणया ग्याःचिकु अप्वयेधुंकाः बजारय् मास्क व सेनिटाइजरया अभाव जूगु दु । कालोबजारी याइपिन्सं उगु सामान सुचुकाः कृत्रिम अभाव ब्वलंकूगु अनुसन्धानय् दुथ्याःपिं अधिकारीपिन्सं धाःगु दु ।

Categorized in दुर्घटना-अपराध