zero media family planning adv

येँया सतकय् फोहर म्हो जुल

नेवा: अनलाइन न्युज – विजयरत्न | २०७८ बैशाख २१, मंगलबार १४:०३:१८

येँ महानगरपालिका दुने थीथी थासय् फोहोर उत्पादनया मात्रा स्वीब्व निसें न्येय्ब्व तक म्हो जूगु खँ येँ महानगरपालिकाया वातावरण व्यवस्थापन विभागं पितबिउगु दु ।

सामान्य इलय् येँ महानगरय् न्हि नीन्यागः गाडी तक फोहोर ल्याण्डफिल साइटय् वनाच्वंगु खः । थौंकन्हय् झिंस्वंगः गाडी जक उखेपाखे वनीगु जुयाच्वंगु दु ।

वातावरण व्यवस्थापन विभागया प्रमुख हरिकुमार श्रेष्ठं जानकारी बियादी कथं व्यवसायिक क्षेत्रय् फोहर यक्को म्हो जूगु दुसा छेँखापतिं पिहावइगु फोहोर नं म्हो जूगु दु, सतकय् मुनीगु व मुंकीगु फोहोर बच्छि पाः जुउगु दु धकाः श्रेष्ठं धयादीगु दु ।

तर थ्व बारेया फोहोरमैला व्यवस्थापन संघया अनुमान भचा फरक खनेदु । संघया महासचिव मीत्र घिमिरेया कथं पिने बन्द जुगुलि मनूतसें छेँ सफा याःगु इलय् फोहोर पिहावंगु खः । थ्व न्ह्यागु इलय् न जुइमखु । उकि आः फोहोरया मात्रा अझ नं म्हो जुइगु सम्भावना दु ।

वयकलं उदाहरण बिया धयादीगु कथं वडा ३, ४ व ७ पाखे न्हापा  न्हिं ८ ट्रिपर फोहोर संकलन जुइ थाय् आः ६ ट्रिपर जक संकलन जुयाच्वंगु खनेदुसा होटल, रेष्टुरेन्ट, पार्टी प्यालेस बन्द जुगुलिं उखेपाखे फोहोर उत्पादन जुइगु म्हो जूगु खनेदु ।

अनुमान कथं लकडाउन जूगुलिं स्वनिगलय् च्वनाच्वंपिं स्वनिगः पिनेया गामय् च्वंपिं थःथःगु गामय् लिहाँ वंगुलिं नं फोहोर म्हो जक पिहाँ वःगु खः धकाः धाःगु दु ।

Categorized in बजाः