dudha jayanti 2568

येँया संकटा क्लबया मिसा फुटबल टिम निर्माण

नेवा: अनलाइन न्युज | ने.सं. ११४४ चिल्लागा दसमी (२०८० चैत्र २२ गते) बिहिवाः

शहीद स्मारक ए डिभिजन लिग क्लब येँया संकटां मिसा फुटबल टिम निर्माण याःगु दु ।

शीर्ष लिग म्हितेगु योजनालिसें क्लबं मिसा टिम दयेकूगु संकटा क्लबया छ्याञ्जे व क्लबया ग्रासरुट एण्ड युथ डेभलपमेन्टया कोअर्डिनेटर आशिषमान सिंहं जानकारी ब्यूगु दु ।

आः स्वंगू विभागीय टिम त्रिभुवन आर्मी, नेपाल पुलिस व एपीएफ क्लबयाके जक मिसा फुटबल टिम दु । संकटा विभागीय बाहेक मिसा टिम निर्माण याःगु न्हापांगु क्लब तकं जूगु दु ।

मिसा टिमया संयोजक तकं जुयाच्वंम्ह सिंहं धाःगु दु, “एएफसी क्लब लाइसेन्सया नियमय् मिसा टिम दयेमाःगु प्रावधान दूगुलिं र्निाण यानागु खः । भविष्यय् एन्फां याइगु मिसा राष्ट्रिय लिग म्हितेगु आज्जु तकं दु ।”

थ्व बाहेक नकआउट फुटबल कासा म्हितेगु प्रस्ताव वःसा उकी नं सहभागी जुइगु सिंहं जानकारी ब्यूगु दु ।

मिसा टिमया प्रशिक्षण न्ह्याःगु प्यन्हु दत । मिजं टिमया हे प्रशिक्षक रविन्द्र शिलाकारं हे मिसा टिमयात प्रशिक्षण बियाच्वंगु दु । शिलाकारयात अजय महर्जनं ग्वाहालि यानाच्वंगु दु । संकटाया मिसा टिमय् आः २५ म्ह कासामि दु । इमिसं तिंख्यलय् प्रशिक्षण कयाच्वंगु दु ।

संकटा क्लबया छ्याञ्जे व क्लबया ग्रासरुट एण्ड युथ डेभलपमेन्टया कोअर्डिनेटर लिसें मिसा टिम संयोजक आशिषमान सिंहं धाःगु दु, “आः राष्ट्रिय टिमय् म्हितूपिं कासामि मदु । तर प्रदेशस्तरय् म्हितेधुंकूपिं व यू–१३ छनोटया नितिं वःपिं कासामिपिं दुथ्याकाः टिम तयार यानागु दु ।”

ताःईया नितिं मिसा टिम निर्माण याःगुलिं प्रायोजक नं मालेगु सिंहं धाःगु दु ।

नेपालय् मिसा फुटबलया छुं स्थायी संरचना मदु । गुबलें विभागीय टिम व प्रदेश लिसेंया कासा जुइ । गुबलें विभागीय व नगरपालिकास्तरया टिम दुथ्याकाः कासा जुइ । क्लब म्हो जूगुलिं नं मिसा फुटबलया संरचनाय् एकरुपता वयेमफूगु खः ।

छुं ई न्ह्यः अखिल नेपाल फुटबल संघ एन्फां ए डिभिजन म्हितीगु क्लबतसें टिम निर्माण याःसा मिसा फुटबलया संरचना परिवर्तन यायेगु विषयस तकं सहलह याःगु खः । तर थुकी फुक्क क्लबं मिसा टिम निर्माण याये मफइगु जुइधुंकाः एन्फां राष्ट्रिय मिसा लिगय् प्रदेश व स्वंगू विभागीय क्लब जक सहभागी याकेगु घोषणा याःगु दु ।

राष्ट्रिय लिगया छनोटया रुपं दूगु न्हापांगु चरणय् न्हयगू प्रदेशं प्रतिस्पर्धा याइ । उकी शीर्ष स्वंगू थासय् दइगु टिम व स्वंगू विभागीय टिम यानाः खुगू टिम सहभागी राष्ट्रिय मिसा लिग ग्वसाः ग्वइ ।

मेगु ए डिभिजन क्लबं नं मिसा टिम निर्माण याःसा बांलाइगु सिंहं धाःगु दु ।

सिंहं धाःगु दु, “थुकी एन्फा, स्थानीय सरकार लिसेंयापिन्सं ग्वाहालि यात धाःस सहज जुइ । आः जिमिसं थःपिनिगु हे खर्चपाखें मिसा टिम दयेकागु दु । थुकिया विषयस स्थानीय सरकारलिसे नं सहलह यायेगु जुइ ।”

संकटा क्लबया आः मिजं सिनियर टिमनापं उमेर समूहया टिम तकं दु । संकटां माघय् क्वचाःगु एन्फा यू–१६ युथ लिग तकं म्हितूगु खः । थ्व बाहेक क्लबं ललित स्मृति यू–१८ च्याम्पियनसिपया नितिं तकं टिक दयेकेगु व ग्रासरुटय् यू–१२ टिम तकं दइगु सिंहं जानकारी ब्यूगु दु ।

Categorized in कासा