newayatataad 2

येँया बानेश्वर शान्तिनगर लागाय् बस, ट्रक व कार ल्वात

नेवा: अनलाइन न्युज – ललेन्द्र शाक्य | २०७७ मङ्सिर १०, बुधबार १२:३६:५१

येँया न्हूगु बानेश्वर शान्तिनगर लागाय् बस, ट्रक व कार थःथवय् ल्वाःगु दु । वंगु चान्हय् जूगु थ्व दुर्घटनाय् टिपर चालक तच्वकं घाःपाः जूगु दु ।

वंगु चान्हय् थ्यंमथ्यं १०ः३० ता इलय् बा७च ८८१७ ल्याःया कार व बा३ख ७१५७ ल्याःया मिनी ट्रक विजुली बजारपाखें तिनकुनेपाखे वयाच्वंगु खः । बानेश्वर चोक. थ्यंमथ्यं २ सय मिटर तापाक्क शान्तिनगर लिक्क उगु गाडीत अःखः दिशां वयाच्वंगु बा३ख ८३९६ ल्याःया बसलिसे ल्वाःगु खः ।

थ्व दुर्घटनाय् ट्रक चालक दोलखाया साविक शैलुंगेश्वर गाविसया ३२ दँया दीपक तामांग तच्वकं घाःपाः जूगु खः । वयात ट्रमा सेन्टरय् वासः यायेगु नितिं भर्ना यानाः वासः यानाच्वंगु दु ।

कार चालक धुलिख्यः च्वनीम्ह विनय श्रेष्ठ न्हू बानेश्वर प्रहरी वृत्तया हिरासतय् दु । बस चालक फरार जुयाच्वंगु दु । बसय् धाःसा यात्रुपिं सुं मदुगु खः ।

Categorized in दुर्घटना-अपराध