1142 nhoo dan adv

येँया कागेश्वरी मनहराय् जमिन तःलं ग्यास पिहाँ वल

नेवा: अनलाइन न्युज – ललेन्द्र शाक्य | २०७८ मङ्सिर २, बिहिबार १४:४८:२५

येँया कागेश्वरी मनहराय् लःया बोरिङ म्हुइगु झ्वलय् ग्यास पिहाँ वःगु दु ।

बुधवाः कागेश्वरी मनहरा ९ या सुन्दरचोकय् च्वंगु तरकारी बजाः लिक्क बोरिङ म्हुइगु झ्वलय् ग्यास पिहाँ वःगु खः । स्थानीयपिन्सं छेँ दयेकेत माःगु लःया व्यवस्था यायेगु नितिं बोरिङ म्हुइगु झ्वलय् ग्यासत्याः पिहाँ वःगु खः । बुधवाः न्हिनय् १२ ता ईनिसें ग्यास पिहाँ वःगु स्थानीयपिन्सं धाःगु दु ।

सुरुया प्यघौतक तिव्रगतिं सुख्खा ग्यास जक पिहाँ वःगुलिं सनिलया ४ ता ईनिसें प्याःगु नाःथें च्वंगु वस्तु तकं पिहाँ वःगु खः । ग्यासलिसें पिहाँ वःगु उगु नाःथें जाःगु प्याःगु वस्तु जःखःया छेँय् थ्यनेधुंकाः स्थानीय ग्याःचिकुइ लाःगु खः ।

ग्यास पिहाँ वःगु सम्बन्धय् सुरक्षाकःमिपिन्त तत्काल हे खबर याःसां नं नियन्त्रणया नितिं आःतक छुं पहल मजूगु स्थानीयपिन्सं धाःगु दु । भूगर्भ विभागपाखें प्रतिनिधिपिं वःसां नं छुं प्रतिक्रिया मब्यूसे अथें हे ग्यास नियन्त्रण जुइ धकाः लिहाँ वंगु स्थानीयया धापू दु ।

बोरिङ म्हूबलय् ग्यास पिहाँ वयेधुंकाः न्हिनय् जःखःया थ्यंमथ्यं १ किलोमिटर क्षेत्रय् धुलं गःगु खःसा सनिलय् पिहाँ वःगु नाःथें जाःगु प्याःगु बस्तु लिक्क च्वंगु छेँय् कुतुंवयाः फोहर जूगु खः ।

Categorized in दुर्घटना-अपराध