prabhu baink new

येँयाः जात्रा नं अनिश्चित

नेवा: अनलाइन न्युज – ललेन्द्र शाक्य | २०७७ श्रावण २६, सोमबार १५:३७:१३

थ्वहे वइगु भाद्र १४ गते लायकुलिइ यःसिं थनेवं च्यान्हुयंकं न्ह्याइगु येँयाः (इन्द्रजात्रा) अनिश्चित जूगु दु ।

येँयाः न्यायेकेगु नितिं वइगु भाद्र ३ गते यःसिं भोताहितिइ हयेमाःगु खःसां कोरोना भाइरसया संक्रमणया हुनिं थुगुसी जात्रा न्यायेकेगु कि मन्यायेकेगु सम्बन्धय् छुं नं कथंया निर्णय यायेफूगु मदुनि ।

इन्द्रजात्रा व्यवस्थापन समितिं जात्रा न्यायेकेगु नितिं सकतां कथंया तयारी थःपिन्सं यायेधुनागु जानकारी ब्यूगु दु । समितिया नायः लिसें कुमारी छेँया चिताइदार गौतम शाक्यं नेवाः अनलाइनन्यूजलिसे खँ ल्हासें थुगुसी जात्रा गुगुकथं न्यायेकेगु धैगु सम्बन्धय् गुथि संस्थान, जिल्ला प्रशासन ज्याकुथि प्रमुखपिंलिसे सल्लाह ब्याकाच्वनागु खँ कनादीगु दु ।

वय्कलं येँयाः जात्रा यःसिं थनेवं हे झ्वःलाक च्यान्हुयंकं न्यायेकेमाःगु जात्रा जूगुलिं न्ह्यः हे सम्बन्धित निकाय नं जात्रा न्यायेकेगु कि मन्यायेकेगु धैगु सम्बन्धय् स्पष्ट निर्देशन व मापदण्ड पितबिइमाःगु खँ कनादीगु दु ।

भाजु शाक्यं थौंकन्हय् दुने हे गुथि संस्थान, प्रमुख जिल्ला अधिकारी, येँ महानगरपालिकालिसें येँयाः जात्रा लिसे सम्बन्धित व्यक्तिपिं च्वनाः जात्रायात कयाः निर्णय यायेगु खँ कनादीगु दु ।

Categorized in नेवाः