nepal life 2076 3 18

युद्ध क्वचाःगु व अफगानिस्तान त्याकागु तालिवानया घोषणा

नेवा: अनलाइन न्युज – ललेन्द्र शाक्य | २०७८ श्रावण ३२, सोमबार १२:१९:३६

विद्रोही तालिवान पुचलं अफगानिस्तान त्याकागु घोषणा याःगु दु । तालिवान लडाकुपिं राष्ट्रपति ज्याकुथिइ दुहाँ वनेधुंकाः त्याःगु घोषणा याःगु खः ।

अलजजिरा न्यूज नेटवर्कया छगू भिडियो फुटेजय् तालिवान लडाकुपिनिगु तःधंगु पुचः राष्ट्रपति भवनया दुने खनेदु । मेगु छपाः किपातय् इपिं ल्वाभःलिसें राष्ट्रपति च्वनीगु कुर्सीइ च्वनाच्वंगु खनेदु ।

तालिवानया छम्ह प्रवक्तां अलजजिरायात धाःगु दु, ‘अफगानिस्तानय् युद्ध क्वचाःगु दु । जिमिगु देशया मुक्ति व जिमि जनताया स्वतन्त्रता जिमिसं प्राप्त यानागु दु ।’

विद्रोहपाखें २० दँ लिपा हाकनं सत्ताय् थ्यंगु तालिवानं थौं ‘इस्लामिक एमिरेट अफ अफगानिस्तान’ घोषणा याइगु अन्तर्राष्ट्रिय समाचार एजेन्सीपिन्सं न्ह्यथंगु दु ।

तालिवान पुचः आइतवाः राजधानी काबुल दुहाँ वयेखतं राष्ट्रपति असरफ घानीं देस त्वःतूगु खः । उपराष्ट्रपतिं नं देस त्वःतूगु हल्ला जूसां नं वं थःम्हं काबुल जक त्वःतागु व अफगानिस्तानय् हे दूगु धाःगु दु ।

Categorized in अन्तर्राष्ट्रिय