dudha jayanti 2568

युक्रेनया पावर प्लान्टय् रुसया आक्रमण : विजुली म्हो जुइफूगु च्यूताः

नेवा: अनलाइन न्युज – ललेन्द्र शाक्य | ने.सं. ११४४ चिल्लाथ्व चौथी (२०८० चैत्र ३० गते) शुक्रवाः

रुसं युक्रेनया तःधंगु मध्येया छगू पावर प्लान्टय् आक्रमण यानाः ध्वस्त याःगु दु ।

बिहिवाः कियम क्षेत्रय् लाःगु ट्रिपिलिस्का पावर प्लान्टय् रुसं मिसाइल आक्रमण याःगु खः । आक्रमणपाखें पावर प्लान्टय् मिँ च्याःगु व विजुली उत्पादन बन्द जूगु बीबीसीं जानकारी ब्यूगु दु ।

रुसं लिपांगुखुसि युक्रेनया विजुली, रेलवे लाइन, तां(पुल)लिसेंया न्यागू क्षेत्रय् आक्रमण केन्द्रीत याःगु खः । थ्वहे अभियान अन्तर्गत ट्रिपिलिस्का पावर प्लान्टय् आक्रमण जूगु खः ।

युक्रेनया राजधानीपाखें थ्यंमथ्यं ४५ किलोमिटर दक्षिणय् लाःगु ट्रिपिलिस्का पावर प्लान्ट विजुली संयन्त्रण छगू महत्वं जाःगु हिस्सा खः । थ्वपाखें युक्रेनयात तःधंगु झड्का लाःगु धाःगु दु ।

थ्व युक्रेनया मुक्कं बिजुली उत्पादन क्षमताया थ्यंमथ्यं १० प्रतिशत हिस्सा खः । अन उत्पादित बिजुली कियभलिसें स्वंगू प्रदेशय् आपूर्ति जुइगु जुयाच्वंगु खः । थ्व ध्वस्त जुइधुंकाः देसय् बिजुली म्हो जुइफूगु अनुमान याःगु दु ।

रुसं मिसाइल व ड्रोन छ्यलाः युक्रेनय् आक्रमण यानाच्वंगु दु । युक्रेनया जापोरिज्जा परमाणु ऊर्जा संयन्त्रय् नं आक्रमण जूगु दु । थ्व युरोपया दकले तःधंगु परमाणु संयन्त्रमध्येया छगू खः । ड्रोन हमलापाखें अन बिष्फोट जूगु खः ।

अन्तर्राष्ट्रिय परमाणु ऊर्जा एजेन्सी (आईएईए) नं धाःसा संयन्त्रया सुरक्षाय् तत्काल छुं खतरा मदूगु जानकारी ब्यूगु दु ।

तर संयन्त्रया स्थिति अतिकं गम्भीर जूगु ख्याच्वः वं ब्यूगु दु । निन्हु मदिक्क अन हे आक्रमण जूबलय् यदि क्षति जूगु जूसा उकिं गम्भीर लिच्वः हयेफूगु ख्याच्वः ब्यूगु दु ।

Categorized in अन्तर्राष्ट्रिय