nepal life 2076 3 18

यातायात व्यवसायीं भाडा समायोजनया माग तसें सतकय् जुलुस

नेवा: अनलाइन न्युज – ललेन्द्र शाक्य | २०७८ श्रावण ७, बिहिबार ११:४७:५०

भाडा समायोजन व कोरोनाविरुद्धया खोप माग यासें यातायात व्यवसायीपिन्सं येँय् जुलुस पिकाःगु दु ।

यातायात व्यवसायीपिन्सं थौं बिहिवाः सुथय् थःथःगु सार्वजनिक यातायातया साधनलिसें जुलुस पिकाःगु खः । बालाजु, जोरपाटी लिसेंया थासं पिकाःगु उगु जुलुसं रिङरोड परिक्रमा याःगु खः ।

जुलुसय् पिहाँ वःगु सवारीसाधनया सतकय् ताःहाकःगु लाइन हे जूगु खः । चीग्वःगु व तःग्वःगु गाडीत नापनापलं रिङरोडय् पिहाँ वःबलय् ट्राफिक जामया समस्या नं जूगु खः ।

सार्वजनिक यातायात केन्द्रीय महासंघ नेपालया आह्वानय् सतकय् पिहाँ वःपिं यातायात व्यवसायीपिन्सं यातायातया भाडा व ट्याक्सीया सुरुवाती कल समायोजन यायेत, कोभिड १९ खोपया व्यवस्था यायेत, २० दँ अवधि थ्यंगु सवारीसाधनया अवधि थप यायेत, नवीकरण व जरिवान छुट यायेत लिसेंया माग तःगु खः ।

सार्वजनिक यातायात केन्द्रीय महासंघया उपमहासचिव केशव नेपालं २०६९ साललिपा वैज्ञानिक भाडा समायोजन मजूगुलिं आन्दोलनय् क्वाहाँ वयेमाःगु धाःगु दु ।

केशव नेपालं धाःगु दु, ‘कि २०६९ सालय् भाडा समायोजन याःबलय् जूगु हे पेट्रोल डिजेलया मू कायम यायेमाल, कि धाःसा वैज्ञानिक भाडा समायोजन यायेमाल ।’

संघ सरकारं अन्तर प्रदेशया यातायातया भाडा बृद्धि याःसां नं प्रदेश दुने व स्थानीय रुपं चलेजुइगु सार्वजनिक गाडीतय्गु भाडा समायोजन मजूबलय् सवारी चले हे यायेमफइगु अवस्था वःगु महासंघया उपमहासचिव केशव नेपालं धाःगु दु ।

Categorized in बजाः