1142 nhoo dan adv

यल १६ वडाब्यापि कासाय् संगीतज्ञ मोहनप्रसाद जोशीयात ‘ललितरत्न’ सम्मान

नेवा: अनलाइन न्युज – Bijay Ratna | २०७८ कार्तिक २१, आइतबार १३:३५:५९

यल महानगरपालिका १६ वडा कलाकार समितिया ग्वसालय् जूगु १६ वडा ब्यापिं म्ये व हुलाप्याखं कासाय् म्येपाखे स्वनिम्हया सक्षम शर्मा न्हाप सिरपाः त्याकादिलसा हुलाप्याखनय् न्याधःया श्रुति शाक्यं न्हाप सिरपाः त्याकादिल ।

म्ये कासाय् ल्यू महापालया राधिका श्रेष्ठं ल्यू व जोमबहाःया यजु शिल्पकारं लियांल्यू सिरपाः त्याकादिल । हुलाप्याखनय् तःजाःफःया विशाखा शाक्यं ल्यू सिरपाः त्याकादिलसा झतापोलया एन्जेला शाक्यं लियांल्यू सिरपाः त्याकादीगु खः । कासाय् म्ये व हुलाप्याखं विधाय् न्हापलाःपिन्त म्हतिं नीन्याद्वः, ल्यूलाःपिन्त म्हतिं झिंन्याद्वः, लियांल्यू लाःपिन्त म्हतिं झिद्वः तकानापं ट्रफी, दसिपौ व ट्रेनिङ प्याकेज त्याकादिलसा ट्रेनिङ्ग प्याकेज सिरपाः उत्कृष्ट झिम्हेसित नं लःल्हाःगु जुल ।

उत्कृष्ट झिम्हय् लाःपिं म्येपाखे पट्कोया बबिन राजोपाध्याय, चल्खुया सिम्रन शाक्य, न्याखाचुकया शैलेश बज्राचार्य, बुबहालया राजेश बज्राचार्य, नकबहिलया जेनिश ज्योति शाक्य, गाःबहालया सुनिलबज्राचार्य व झतापोलया अमिर शाक्य खःसा हुला प्याखंपाखें कुमारीपाटीइ च्वनादीम्ह श्रेशा श्रेष्ठ, धौगलया विभूषणा बज्राचार्य, न्याखाचुकया उत्पला बज्राचार्य, धपगालया श्रृया बज्राचार्य, बुबहालया नैरात्मा बज्राचार्य, न्याखाचुकया सुयंका बज्राचार्य व कायगुननिया लक्की महर्जन खः।

वडाया मचा कलाकारपिन्त हःपाबी कथं कासाय् दुथ्याःपिं  झिनिदँ क्वययापिं कासामिपिन्त “भिंतुना सिरपा” लःल्हाःगु उगु ज्याझ्वलय् थुगु सिरपाः म्येपाखे गुदँ दुम्ह बुबहालया रिभनमुनि बज्राचार्य व कुलिम्हया झिदँदुम्ह सजेना महर्जन खःसा हुला प्याखनय् बुबहालया झिंनिदँ दुम्ह निष्ठा बज्राचार्य, महापालया  झिदँया श्रीजु श्रेष्ठ व न्याधःया च्यादँ दुम्ह स्मृति शाक्यं त्याकादीगु खः ।  

कासाय् दकले अप्वः स्वकुमिपिन्सं स्वःगु भिडियो “टप भ्यूज” या सिरपाः म्येपाखे चल्खुया सिम्रन शाक्यं त्याकादिलसा हुला प्याखंपाखे दौबहाःया श्रीजु शाक्यं त्याकादीगु खः ।

ज्याझ्वलय् संगीत प्रवीण मोहनप्रसाद जोशीयात “ललितरत्न” या उपाधिपाखें छायेप्यूसें हंगु खः ।  हनेज्या लिपा थःगु नुगःखँ तयादिसें संगीतया विकास व विस्तारय् योगदान यानादीपिन्त हनेगु, थुगु पुस्तायात कला न्ह्यब्वयेत दबू बीगु व न्हूपिं कलाकारपिं मालेगु थें जाःगु थुगु ज्या अतिकं च्वछाय् बहःजू धयादिल ।

ज्याझ्वःया मूपाहां ललितपुर महानगरपालिकाया मेयर चिरिबाबु महर्जनं कलाकारपिनिगु नितिं ललितपुर महानगरपालिका १६ वडां याःगु थुगु ज्या महानगर अझ तब्याः यानाः यंकेगु खँ कनादिल ।

ग्वसाःखलः ललितपुर महानगरपालिका वडा १६ अध्यक्ष निर्मलरत्न शाक्यं पुलांगु ऐतिहासिककला, सम्पदाया संरक्षण गुलिमहत्वं जाः, उलि हे महत्व थुगु पुस्ताया कलाकारपिनिगु विकास, व वयकःपिन्त बीमाःगु प्रोत्साहन नं खः धकाः धयादिल । यलया दरबार क्षेत्रया ऐतिहासि व सांस्कृतिक महत्वं जाःगु कात्तिदबुली जूगु थुगु ज्याझ्वलय् लोकं ययेकूपिं कलाकारपिं सुरजवीर बज्राचार्य , भूपेन्द्र बज्राचार्य, नील शाक्य, मोहिद्दिन खान, अमोघवीर बज्राचार्य, अमर चित्रकारं म्ये न्यंकादीगु खःसा कोरियोग्राफर निसिला शाक्यं हुलाप्याखं न्ह्यब्वयादिल । १६ वडाया संचारख्यःया ब्यक्तित्वपि अनुप शाक्य, मञ्जु बज्राचार्य, सलोना बज्राचार्य, प्रलिशा शाक्य, सुरजवीर, अमोघवीरं ज्याझ्वःन्ह्याकादिल ।

Categorized in कला