zero media family planning adv

यल लुँवहः व्यवसायी संघं शताब्दी पुरुष जोशीयात हन

नेवा: अनलाइन न्युज – विजयरत्न | २०७६ पौष २७, आइतबार १६:०८:०९

यल (ललितपुर) सुनचाँदी व्यवसायी संघया वहःदँ (रजत वर्ष)या लसताय् जूगु छगू तःजिगु ज्याझ्वलय् वाङमय शताब्दी पुरुष संस्कृतिविद् डा. सत्यमोहन जोशीयात तःजिक हनेज्या याःगु दु ।

ज्याझ्वलय् मूपाहाँ कथं झायादीम्ह वाङमय शताब्दी पुरुष जोशीं थःगु नुगःखँ तयेगु झ्वलय् तिसा नं देसया छगू तःमिगु संस्कृति खः धासें सुनचाँदी व्यवसायीपिन्सं तिसाया संरक्षणय् ज्वःमदुगु भूमिका म्हिताः वयाच्वंगु दु धकाः धयादिल ।

शनिवाः यलया शंखमूलया यल दरबार पार्टी प्यालेसय् जूगु उगु ज्याझ्वलय् नेवाः पत्रकार राष्ट्रिय दबूया केन्द्रीय नायः सुरजवीर बज्राचार्ययात नं कदर यासें हनेज्या याःगु खः ।

उगु ज्याझ्वलय् कलाकार शरद शाक्य व भाषाह्यःमि चण्डेश्वर श्रेष्ठपिन्त नं हनेज्या याःगु खः ।

संघया नायः किरणभाई बज्राचार्यया सभानायःसुइ न्हयाःगु उगु ज्याझ्वःया लिपांगु चरणय् न्हूगु कार्यकालया नितिं ल्यज्या नं जूगु खःसा निर्वाचन अधिकृत किरण शाक्यं निर्वाचन परिणामया घोषणा नं यानादीगु खः ।

निर्वाचनय् सर्व सम्मत कथं ल्यज्या जूगु खः । उगु ल्यज्यापाखें नायः पदय् रमेश बहादुर शाक्ययात ल्यःगु दु ।

अथेहे, न्वकूपिं निम्ह मोतिमान –हेम) शाक्य व बिजेन्द्र बज्राचार्य, मूछ्याञ्जे विपिन शाक्य, दांभरी हेराकाजी शाक्य, छ्याञ्जे संजय शाक्य, ल्यूदांभरी राजेन्द्र शाक्य जुयादीगु दु ।

उगु ज्यासना पुचलय् मूदुजः कथं राकेश बज्राचार्य, सिद्धिमान बज्राचार्य, सुदन शाक्य व निरञ्जन बज्राचार्यपिन्त सर्व सम्मतं ल्यःगु खः ।

 ललितपुर सुनचाँदी व्यवसायी संघया रजत दँया लसता ज्याझेवलय् यल महानगरपालिकाया मेयर चिरीबाबु महर्जन, राष्ट्रिय उपभोक्ता मञ्चया नायः प्रेमलाल महर्जन, सांसद नवराज सिलवाल, पुलांम्ह मन्त्री बुद्धिराज बज्राचार्य, न्हूदँ राष्ट्रिय समारोह समिति ११४० या नायः लिसें नेपालमण्डल टेलिभिजनया प्रमुख रमेश महर्जन लिसेलिसें थीथी व्यक्तित्वपिं विशिष्ट पाहाँ कथं उपस्थित जुयादीगु खः ।

ज्याझ्वलय् संघया स्मारिका मूपाहाँ वाङमय शताब्दी पुरुष सत्यमोहन जोशीया ल्हाःतं सार्वजनिक जूगु उगु ज्याझ्वलय् संघयात थीथी कथं ग्वाहालि यानादीपिन्त लुमन्ति चिं लःल्हाःगु खः ।

किपाः राजेन्द्र रंजित

Categorized in बजाः