nepal investment baink

यलय् इखाछेँया ग्वसालय् बुद्ध जयन्ती हनिगु

नेवा: अनलाइन न्युज | ने.सं. ११४४ बछलाथ्व खस्थि (२०८१ जेष्ठ १ गते) मंगलवाः

थुगुसी बुद्ध जयन्ती बलय् यल मनपा वडा नं ११ या इखाछेँ त्वालय् २५६८ क्वःगु बुद्ध जयन्ती तःजिक न्यायेकीगु जूगु दु। 

स्वांया पुन्हि खुन्हु भगवान बुद्धया स्वंगु संयोग  जन्म, परिनिर्वाण व बोधिज्ञान लाभ जूगु  त्रिसंयोग चूलागु दिन खःसा वहे प्रतीक सहित  थुगुसी शोभा यात्रा याइगु ग्वसाः दु। 

उकथं हे बुद्ध जयन्ती समारोहयात ताःलाकेगु निति थीथी नीनिगू उपसिमित नं नीस्वंगु दु। भगवान बुद्धया जन्म, बोधिज्ञान लाभ व बुद्धया महापरिनिर्वाणया स्वंगुलि घटनाया महत्वयात उलेगु कथं थुगुसीया बुद्ध जयन्ती हनेगु खँ ग्वसाः खलकं धाःगु दु। 

थ्व खँया जानकारी बिइगु निंतिं २५६८ क्वःगु बुद्ध जयन्ती समारोह समितिपाखें छगू  पत्रकार सम्मेलन यासें थ्व जानकारी बिउगु खः ।

पत्रकार सम्मेलनय् समारोह समितिया नायः यज्ञमान शाक्यं समारोहया प्रेस विज्ञप्ति न्ह्यब्वयादीगु खः।

ज्याझ्वलय् ललितपुर बुद्ध जयन्ती कोषया नायः चन्द्रमान शाक्य , यल वडा ११ या वडाध्यक्ष अरोजकुमार खडगी , नेवाः पत्रकार राष्ट्रिय दबूया केन्द्रिय न्वकु सुनिल महर्जन पिन्सं ज्याझ्वः यात सम्वन्धय् जानकारी बियादीगु खः ।

किपाः बिक्रम खडगी

Categorized in स्थानिय-समाज