Header Nepal rastra bank Adv

यलया सुनागुथिइ बालकुमारी देगःया मूर्ति खुयायंकल

नेवा: अनलाइन न्युज – ललेन्द्र शाक्य | २०७८ माघ ९, आइतबार ११:४७:४६

यलया ऐतिहासिक नेवाः बस्ती सुनागुथिइ च्वंगु बालकुमारी देगलय् च्वंगु मूर्ति खुयायंकूगु दु । पित्तलया निगू फिट तःधिकःम्ह व डेढ फिट चौडाइया पुलांगु मूर्ति वंगु चान्हय् खुयायंकूगु खः ।

देगःया पुजारी थौं आइतवाः सुथय् ४ ता इलय् नित्यपूजा यायेत वंगु इलय् मूर्ति गायब जुइधुंकाः स्थानीय जनप्रतिनिधिपिन्त खबर याःगु खः । वधुंकाः प्रहरीयात जानकारी ब्यूगु खः ।

यल प्रहरी प्रमुख एसएसपी यज्ञविनोद पोखरेलं मूर्ति खुयायंकूगु जानकारी वयेखतं मालेगु ज्इा यानाच्वंगु जानकारी ब्यूगु दु ।

स्थानीय बासिन्दापिनिगु कथं देगः दुने दुहाँ वयनेत प्यंगू ध्वाखा पुलाः वनेमाः, अन गुज्वः (९ जोर) तालं ग्वयातःगु खः । व फुक्क ताःचाः तछ्यानाः मूर्ति खुयायंकूगु खः ।

बागमती प्रदेश सभा दुजःतकं जुयाच्वंम्ह सुनागुथिया स्थानीय बासिन्दा राजकाजी महर्जनया कथं उगु देगः गुथिया खः । व गुथि स्वनिगःया हे अतिकं धनी जूगु गुथि कथं कयातःगु दु । उगु गुथिं खुसः (६ सय) परिवारयात संगठित यानातःगु दु ।

सुनागुथि यल जिल्लाया पूर्वपाखे लाःगु अतिकं ऐतिहासिक महत्वं जाःगु मुक्कं नेवाः वस्ती खः । सुनागुथि महर्जन (ज्यापु) समुदायया बाहुल्यता दूगु पुलांगु बस्ती खः । अन ततःधंगु स्वंगू गुथि दुसा उगु स्वंगू गुथिया थःथःगु विशेष महत्व दु ।

सुनागुथिइ तःधंगु जात्राया इलय् यःसिं धंकेगु प्रचलन नं दुसा अन जात्राबलय् प्यखः देखः ब्वाकीगु चलन नं दु । अथेहे, सुनागुथिं नेपालय् हे दकले तःधिकःम्ह दोहः दूगु महाद्यःया देगः नं दुसा छुं दँ न्ह्यः जक सुनागुथिइ संसारय् हे दकले तःधिकःम्ह भिन्द्यः पलिस्था याःगु दु ।

Categorized in स्थानिय-समाज