nepal investment baink

यलया युवा वचत सहकारीयात कारवाही यायेमाःगु माग यासें वचतकर्तापिं सतकय्

नेवा: अनलाइन न्युज – ललेन्द्र शाक्य | ने.सं. ११४४ चिल्लागा सप्तमी (२०८० चैत्र १९ गते) सोमवाः

यलया हःखाय् च्वंगु युवा वचत सहकारीं वचतकर्तापिनिगु ध्येबा नयाः बिस्युं वनाच्वंगुलिं उगु सहकारीया संचालकपिन्त कारवाही यायेमाःगु माग यासें म्हिगः आइतवाः पीडित वचतकर्तापिन्सं सहकारी भवन न्ह्यःने ब्यानर व प्लेकार्ड ब्वयाः विरोध प्रदर्शन याःगु दु ।

वचतकर्तापिन्सं धाःकथं उगु सहकारीया नायः मदयेधुंकूगु व संचालकपिं न्ह्यःने खनेमदूगु व थःपिन्सं तयातःगु ध्येबा लितमब्यूगुलिं थथे विरोधय् पिहाँ वःगु खः ।

यलया थीथी त्वालय् च्वंपिं मिसापिन्सं थथे सहकारीया संचालकपिन्त कानूनी दायराय् हयेमाःगु व इमिगु चल अचल सम्पत्ति जफत यायेमाःगु लिसेंया माग यासें हःखांनिसें पूच्वतक जुलुस पिकासें यल महानगरपालिकाय् थ्यंकाः ज्ञापनपौ लःल्हाःगु खः ।

वचतकर्तापिन्सं उगु सहकारीं थ्यंमथ्यं २५ करोड वचतकर्तापिनिगु ध्येबा नःगु व १७ करोड तका मदुम्ह नायः नं त्यासा कयाः मपूगु खँ धाःगु दु ।

Categorized in बजाः