coved ad

यलया ज्वागलय् छम्ह मिसा सिनाच्वंगु अवस्थाय् लुल

नेवा: अनलाइन न्युज – ललेन्द्र शाक्य | २०७८ कार्तिक २१, आइतबार १६:३१:३८

यलया ज्वागलय् छम्ह मिसा सिनाच्वंगु अवस्थाय् लुयावःगु दु । सर्लाहीया बागमती गाउँपालिका छेँ दुम्ह २२ दँया रेखा शाह सिनाच्वंगु अवस्थाय् लुयावःगु खः ।

यल प्रहरी प्रमुख एसएसपी किरण बज्राचार्यया कथं छेँया झ्याःया रेलिङय् यःगायाच्वंगु अवस्थाय् उम्ह मिसाया सीम्ह छेँजःपिन्सं लुइकूगु खः । अस्पताल यंकेधुंकाः चिकित्सकपिन्सं सीधुंकूगु घोषणा याःगु खः ।

एसएसपी बज्राचार्यं धाःगु दु, ‘पिने पसः दूगु खः, थःथितिपिन्सं खनेधुंकाः अस्पताल यंकूगु खः । तर न्ह्यः हे सीधुंकूगु जुयाच्वन ।’

सीम्ह शाहया थःछेँ पक्षं धाःसा वया मृत्यु शंकास्पद जूगु दाबी याःगु दु । इमिगु धापू कथं क्वसः सम्बन्धी विवादय् शाहयात छेँजःपिन्सं यातना बियाः वयाच्वंगु खः ।

एसएसपी बज्राचार्यं धाःगु दु, ‘मृत्युया हुनि ला पोष्टमार्टम रिपोर्ट लिपा हे सीदइ, थुकी मेगु छुं हुनि दु कि धैगु बारे नं अनुसन्धान जुइ ।’

एसएसपी बज्राचार्यया कथं सीम्हयात पोष्टमार्टमया नितिं पाटन अस्पताल यंकूगु दु ।

घटनास्थलय् खटेजूम्ह यल प्रहरी डिएसपी दिपक भारतीया कथं सीम्हेसिके पिने छुं नं घाःपाः खनेमदु । विस्तृत अनुसन्धान जुयाच्वंगु दु धकाः वं धाःगु दु ।

Categorized in दुर्घटना-अपराध