dudha jayanti 2568

यलया ज्ञानमाला भजन शिरोमणि किरण शाक्य मन्त

नेवा: अनलाइन न्युज – ललेन्द्र शाक्य | ने.सं. ११४४ चिल्लाथ्व चौथी (२०८० चैत्र ३० गते) शुक्रवाः

बुद्धधर्म प्रचारप्रसार यायेगु ज्याय् ज्ञानमाला भजन संगीतपाखें च्वछायेबहःगु योगदान बियादीम्ह यलया ज्ञानमाला भजन शिरोमणि लिसें बरिष्ठ संगीतकार किरण शाक्य मन्त ।

भजन शिरोमणि किरण शाक्य बिहिवाः न्हिनय् येँया गोंगःबुइ च्वंगु ग्रीनसिटी अस्पतालय् ८७ दँया उमेरय् मदुगु खः ।

गुन्हु न्ह्यः ब्रेन स्ट्रोक जुयाः शाक्ययात अस्पताल भर्ना याःगु खः ।

नेपालभाषा ख्यलय् नांजाःगु दान्यहिरा सिरपाःया सल्लाहकारलिसें यल ओकुबहाःया त्रिरत्न ज्ञानमाला भजन खलःया सल्लाहकार जुयाच्वनादीम्ह खः मदुम्ह भजन शिरोमणि किरण शाक्य । वय्कःयात नेपालभाषा एकेदमिं बौद्ध संगीतया लागाय् ज्वःमदुगु योगदान यानादीगु कदर कथं दान्यहिरा सिरपाः नं लःल्हाये धुंकूगु दु ।

मदुम्ह बरिष्ठ संगीतकःमि ज्ञानमाला भजन शिरोमणि किरण शाक्यया अन्तिम संस्कार थौं यलया बालकुमारी दिपय् जुइगु मदुम्ह शाक्यया छेँजः जुजुभाई शाक्यं जानकारी बियादीगु दु ।

Categorized in कला