2565 buddha Jayanti ADV

यलया छगः नक्षत्र, नेपाःया गौरव कलाकार राजकुमार शाक्य मन्त

नेवा: अनलाइन न्युज – ललेन्द्र शाक्य | २०७८ जेठ २२, शनिबार २०:४९:४२

ऐतिहासिक कला नगरी यलय् जक मखु, समग्र नेपाः देसय् जक मखु देसं देसय् हे नांजाःम्ह यल नगरीया छगः ज्वःमदूगु नक्षत्र, नेपाःया गौरव बरिष्ठ कलात्मक हस्तकलाया मूर्धन्य कलाकार एवं मूर्तिकार राजकुमार शाक्य थौं शनिवाः सनिलय् आकाझाकां सुमेरु अस्पतालय् वासः यायेगु झ्वलय् मन्त ।

मदुम्ह बरिष्ठ हस्तकला कलाकार राजकुमार शाक्यया छम्ह विद्यार्थी मंजिल शाक्यं बियादीगु जानकारी कथं न्हापा कोरोना भाइरस संक्रमण जुयाः वासः यानाः लनेधुंकूगु व प्यन्हु न्यान्हु न्ह्यः हाकनं स्वास्थ्यस गडबडी वःगुलिं अस्पताल भर्ना जुयादीम्ह राजकुमार शाक्य थौं शनिवाः सनिलय् मदुगु खःसा वय्कःयात निमोनिया नं जूगु खः धकाः जानकारी बियादीगु दु ।

न्हापा मदुम्ह कलाकार शाक्यया छेँजःपिं सकलें हे कोरोना संक्रमित जूगु खःसा सकल छेँजःपिं वासः यानाः लनेधुंकूगु खः । कोरोना संक्रमणया हे झ्वलय् मदुम्ह शाक्यया अबुजु कोरोनापाखें लच्छि हे मदुनि मदुगु जानकारी नं मदुम्ह शाक्यया विद्यार्थी मंजिल शाक्यं बियादीगु दु ।

यलया थैना त्वालय् च्वनादीम्ह ५४ दँया जःखःया अतिकं मिलनसार व मृदुभाषी प्रतिभावान् कलाकार शाक्यया यल नगरी दुने जक मखु यल नगरी पिनेयापिं आपालं आपा हे विद्यार्थीपिं दुसा उपिं विद्यार्थीपिन्सं मदुम्ह राजकुमार शाक्ययात थःपिनि छम्ह सेल्लाःम्ह गुरु व पथप्रदर्शकया रुपं कयावयाच्वंगु खः ।

परम्परागत हस्तकलायात सीमित थःपिनिगु छेँजः दुने जक लिमकुंकूसे सार्वजनिक रुपं सकलसिनं खुल्ला रुपं ज्या सयेकेकेगु अधिकार दयेमाः व उगु कलायात जीवनय् उपयोगी कथं छ्यलेमाः धैगु विचारधारा प्रेरित जुयाः यक्वःसित शाक्यं उगु कला प्रशिक्षण बियादिल । थौंकन्हय् वय्कःया शिष्य कलाकारपिं नांजाःपिं सक्षम व स्यल्लाःपिं हस्तकला कलाकार जुयाः पिदनेधुंकूगु दु ।

मदुम्ह शाक्य भुटानय् ११५ फिट तःधिकःम्ह पद्मसम्भव गुरुया मूर्ति पलिस्थाया छम्ह न्ह्यलुवा जुयादीम्ह खःसा वय्कःया ज्यापाखें अतिकं प्रभावित जुयाः भुटानया राजकीय सम्मान तकं कायेत ताःलाःम्ह हस्तकला कलाकार खः । वय्कलं आपालं हे सम्मान लिसें सिरपाःत त्याकादी धुंकूगु दुसा नेपाल सरकारपाखें मदुम्ह कलाकार राजकुमार शाक्ययात गोरखा दक्षिण बाहुपाखें नं सम्मानित यायेधुंकूगु दु । 

यलया छगः थीगु नक्षत्र, हस्तकलाया जादुगर अले नेपाःया गौरव कलाकार राजकुमार शाक्य अकल्पनीय कथं आकाझाकां मदुगुलिं यल नगर जक मखु समग्र देसं हे छगः बहुमूल्य ज्वःमदुगु रत्न त्वःफिकेमाःगु दु । 

मदुम्ह शाक्ययात परम्परागत हस्तकलायात नं कःघानाः उगु विधायात आधुनिकताय् यंकादीम्ह छम्ह ज्ञाताया रुपं नं सकलसिनं म्हस्यू ।

मदुम्ह राजकुमार शाक्यया जहानलिसें निम्ह काय, निम्ह किजा, स्वम्ह केहेँपिं दी ।

Categorized in कला