Header Nepal rastra bank Adv

यथार्थ चिबाखँ...मां भाय् दिवस

–विनय राजोपाध्याय

– रेरवा / एफ.एम. चायेकाः तःगुमछि स्टेशन हायेका, गनं न थःगु भाय्या ज्याझ्वःत थ्वयाच्वंगु जिं तायेके मफु ।

– टिभी चायेका, च्यानलत हिलाः हिलाः स्वयां अन नं गनं थःगु भाय्या ज्याझ्वःत वयाच्वंगु जिं खंके मफु ।

बरु बिदेशी भाय् हिन्दी भाय्या यक्वः हे ज्याझ्वः÷संकिपाः÷म्येत थ्वयाच्वंगु खना । स्वदेशय् हे च्वना नं, देसया नुगलय् च्वना नं थनया भाय् लुइके मफु जिं ।

– क्याम्पस वना । अन नं थःगु भाषं गुगुं न बिषय ब्वंकेगु मयाः ।

– स्कुल वना । अन नं थःगु भाय्यात छखे तया मेगु भाषं ब्वंकेमाःगु जिगु बाध्यता ।

जिं थःगु भाषं खँ ल्हाये मखंगु तःन्हु दयेधुंकल । जितः थःगु भाषं खँ ल्हाये मास्ति वः । थःगु भाषं न्वःवाये मास्ति वः । जिगु म्हुतु थःगु भाषं खँ ल्हायेत तसकं उलुउलु मिनाच्वन तर थःग भाषं खँ ल्हाइम्ह जिगु लिक्क सुं मदु । जितः तसकं उकुसमुकुस जुल । थब्ले हे छक्वः पासा रामजनमं धाःगु लुमना वल ।

‘अरे पासा ! मलाई नि बेलाबेलामा हां यस्तै भइलिन्छ । तब दुइचार दिन बिदाविदा लिइ गाँव गइलिन्छु । अनि आफ्नो भाषाको तिर्खा मेटाई लिन्छु हां ।’

रामजनम ला थःगु मां भाय्या प्याःचा लंकेत थःगु गां वनी, तर जि थःगु भाय्या प्याःचा लंकेत गन वनेगु ? जि बूगु हे थन । जि ब्वलंगु हे थन । पुर्खौंनिसें थन हे च्वनाच्वनापिं गन वनेगु ? थ्व प्याःचा लंकेत गन वनेगु ? सुकिलामुकिला शहरीया त च्वनिगु थाय् थ्व । गामं वःपिं नवशहरियापाखें बलात्कृत शहरया बासिन्दा जि ला । थथे प्याचाः लंके थाय् मदु जिगु । गन वने ? गन वने ?

बिरक्त जुया फेसबुक चायेका अन जक जूसां लुधंके धकाः । तर अन न थःगु भाय् लुइके हे थाकु । अले थःम्हं हे छगू स्टाटस च्वया ।

‘थौं फेब्रुअरी २२ तारिख, हलिं मांभाय् दिवसया लसताय् सकल मां भाय्यात मतिना यानादीपिन्त भिंतुना । मां भाय्यात मतिना याय् । थौं छन्हु ला थःगु मां भाषं थन थःगु नुगः खँ च्वया स्टाटस् तयादिसँ ।’

च्वये सिधयेका पोष्ट याना । पोष्ट यायेधुनेवं हे छम्ह नेवाः थर दुम्ह पासां कमेन्ट यानाहल–
‘कृपया नेवारी नबुझ्ने हुनाले नेपालीमा लेख्नु भए आभारी हुने थिएँ ।’

व नेवाः पासाया कमेन्ट ब्वनाः जि चि नंम्ह खाःथें भुग्लुं च्वनाच्वना ।