यंकि यंकि कोरोना यंकि (बालगोपाल श्रेष्ठया चिनाखं)
नेवा: अनलाइन न्युज | २०७६ चैत्र २६, बुधबार १४:३६:१७
बाल गोपाल श्रेष्ठ
यंकि यंकि कोरोना यंकि
झोक्कमनिपिं छेरावतिं नं मथ्युपिं
सकस्यां थुकलं बिल नं
लज्जा मचासें न्हिला न्हिला जुइ छापिं
धेताहा, फताहा शाषक, प्रशासकतयत यंकि
यंकि यंकि कोरोना यंकि
थपायचो महामारीया इलय नं
सोसोखंक घुस नयेत लिफ मपुलिपिं
कपाकप कमिसन नयेत लिफ मपुलिपिं
भ्रष्टाचारि व भ्रष्टाचारीतय संरक्षकतयत यंकि
यंकि यंकि कोरोना यंकि
दुःखि गरिवया नामय सत्ताय वना
थपिनिगु हे जक च्युताय दुना
दुःखि गरिव स्यानाचोंपि
घितिघिति पना नं
सत्ता व शक्तिया मोहं कां जुया
देस झ्वाकलय दुंसां वास्ता मदुपिं
रोगी, महारोगी, पद लिप्सांग्रस्ट शाषकतयत यंकि
यंकि यंकि कोरोना यंकि
मेहेनती जनता देसं पितिना
लास मजुतले कत देसय चुतु चुइका
देसय रेमिट्यान्स दुकया
लय लयताया पस्ता भोय न्यायेकाचोंपि
नुगलय भ्या हे हि मदुपिं
देसद्रोहि, जनद्रोहि नरपशुतयत यंकि
यंकि यंकि कोरोना यंकि
थगु व थथितिपिनि जक भिं जुइगु जूसा
न्ह्याथेंजागु कुकर्म यायेत नं लिमसोइपिं
देश, जनता नांगा याना
थगु हे जक धुकुति जायेक जुइपिं
नेपा देयया भ्रष्ट अकर्मन्य राजनैतीक पार्टि
अबिवेकी राजनैतीक नेतातयत यंकि
यंकि यंकि कोरोना यंकि
थीथी जाति भाषा दुगु नेपाल देसय
थगु छगू जाति जक महान धया
थगु छगू धर्म जक महान याना
थगु छगू भाषा जक नेपाली दयेका
स्कुल अडालतय नं व हे छगू भाषा जक कोचिना
सरकारी ज्याखंय नं व हे छगू भाषा जक छेला
दे दुनेया सकतां भाषा जाति स्यायेत तल्लिन
थो देयया एकल नश्लवादी शाषकतयत यंकि
यंकि यंकि कोरोना यंकि
ल्वाभ मिया धन मुना
कत देसय मनू ल्वाका स्याका
चिमि देयतयत फोगिं दयेका
विकास, प्रजातन्त्र, मानवता धाधां
धन व धनिपिनि जक पंलिना जुइपिं
धनवादी, साम्राज्यावादी देयया
सकलें नरसंहारकारी नेतातयत यंकि
यंकि यंकि कोरोना यंकि
झोक्कमनिपिं छेरावतिं नं मथ्युपिं
संसारन्यंकया दुष्ट, अत्याचारी, स्वार्थी
अन्धा, अपराधी, नश्लवादी शाषकतयत यंकि
यंकि यंकि कोरोना यंकि
अमित याकनं हे यंकि ।
नेपाल संवत ११४० चौलाथो १२ ५ अप्रैल २०२०
(चिनाखं च्वमि बालगोपाल श्रेष्ठ नेपालभाषा सेवी खःसा वयकः थौकन्ह्य् नेदरलाण्डय् च्वनादी )
Categorized in नेवाः
