1142 nhoo dan adv

म्ह अफगानीया ल्हाः हिन्दूस्थानीया !

२०७२ जेठ ५, मंगलबार १६:१२:२२

अफ़ग़ानिस्तानया कंधारय् सन् २०१० स बमयात निष्क्रिय यानाच्वंगु इलय् थःगु निपां ल्हाः तंकूम्ह क्याप्टेन अब्दुल रहीम थःम्हं न्हूगु ल्हाः तये खनाः तसकं लय्ताःगु दु ।
रहीमयात केरलया कोचीइ अमृता इंस्टीट्यूट अफ मेडिकल साइंसय् जूगु ह्याण्ड ट्रांसप्लांट अपरेशनपाखें न्हूगु ल्हाः दुगु खः । वयात केरलया जर्जया ल्हाः तयाब्यूगु खः, गुम्हसित मोटरसाइकल दुर्घटनालिपा ब्रेनडेथया अवस्थाय् अस्पतालय् हःगु खः ।
क्याप्टेन रहीमं निदँतक इन्टरनेटय् मालेगु व थः पासापिंलिसे ग्वाहालिया निंतिं इनाप याःगु खः । अन्तय् केरलय् आशाया जः खनेदुगु खः ।
रहीमं थम्हं जीवंकाछि जर्जयात ल्वःमंके मफइगु धाःगु दु । लिसें वं थःगु म्ह थः मदये धुंकाः अनुसन्धानया निंतिं भारतयात लःल्हायेगु इच्छा प्वंकूगु दु । अब्दुल रहीम अफगान सेनाय् बम निष्क्रिय यायेगु ज्या याइम्ह खः ।
प्लास्टिक सर्जन डक्टर सुब्रामान्या अय्यरयाकथं रहीमयात ब्रेनडेथ मनूत लुइके थाकुगु खँ कनागु तर व तसकं सकारात्मक जुयाः थुकिया निंतिं पियाच्वंगु खँ कनादिल ।
कन्स्ट्रक्सनया ज्या याइम्ह जर्ज ब्रेनडेथया अवस्थाय् अस्पतालय् हये धुंकाः वया छेँजःपिंलिसे सहलह यानाः सहमत जुइधुंकाः निम्हसियां हि जाँच यायेधुंकाः ल्यं प्रक्रिया न्ह्याकूगु खः ।
डक्टर अय्यरयाकथं शरीर ट्रांसप्लांटयात कयाः फुक्क कानूनी प्रक्रिया पूवंके धुंकाः २० डक्टर, ८ म्ह एनेस्थेसिस्ट व नर्सपिनि ग्वाहालिं १५ घण्टा बिकाः प्यंगू अपरेशन टेबुलय् अपरेशन जूगु खः । डाक्टरपिन्त निगू क्वँय्, निगू धमनी व यक्व नसात स्वायेगु चुनौति दुगु खः ।
डक्टरपिनिकथं रहीमया फिजियोथेरापी जुयाच्वंगु दु । वयात थःगु नसा ब्वलंकेत झिलातक भारतय् हे च्वनेमालीगु जूगु दु ।