नेवा: अनलाइन न्युज | ने.सं. ११४४ बछलाथ्व तृतिया (२०८१ बैशाख २८ गते) शुक्रवाः

नेपालभाषा म्युजिक भिडियोख्यलय् थौंकन्हे न्हियान्हिथं धइथें न्हू न्हूगु म्ये पिहाँवया च्वंगु दु । थ्वहे झ्वलय् विहिवाः यलय् जुगु छगू ज्याझ्वःया दथुइ छपू म्येया म्युजिक भिडियो पितब्वज्या जूगु दु । 

ताः ई न्ह्यः निसें गायन ख्यलय् पलाः न्ह्याका च्वनादीम्ह सुमन बज्राचार्यं हालादीगु उगु ू“ लँय् वइम्ह ” म्येया म्युजिक भिडियो पितब्वज्याय् सन्चारकःमि व संकिपामि रामकृष्ण खडगी मूपाहाँ व नेपालभाषा म्युजिक भिडियो ख्यःया न्हापांम्ह निर्देशक विजयरत्न असंबरे विशिष्ट पाहाँ कथं झायादीगु खः। उगु ज्याझ्वलय् लोकंह्वाम्ह म्येहालामि निशा देसार , सन्चारकःमि स्वतन्त्रसंसार महर्जन , नांजाम्ह क्यामेरोर्सन शंकर महर्जन लगायत विशेष पाहाँ कथं झायादीगु खः । 

सचिका चिना , ङेङापा झ्याः या दरबार लगायत आपालं बाँबांलागु म्युजिक भिडियो दयेकादी धुंकुम्ह विश्वास बज्राचार्य या निर्देशनय् तयार जूगु थ्व भिडियो या कोरियोग्राफि व मू मोडल जुया उपासना शाक्यं ज्या यानादीगु खः । थुके मिजं मोडल कथं विशुम राज शाक्यं मू भुमिका म्हितातःगु दु । 

थ्व म्येया च्वमि व लय् चिनामि फिरोज बज्राचार्य खःसा किपालुमि व छ्यायफ्यायकःमि आकृष्ट शाक्य खः । थ्व म्येया भिडियो मूल रुपं ल्यायम्ह पुस्ताया नुगः साले कथं डान्सिंग स्टेपयात बः बिया तःगुयात प्रशंसा यासे समीक्षा यानादीम्ह विजयरत्न असंबरें नेवाः संगीतख्यः व कलाकारिता ख्यः ल्यायम्ह पुस्ताया दथुइ लोकंह्वाना च्वंगु दु धयादिल ।

मूपाहाँ रामकृष्ण खडगीं गायक सुमन बज्राचार्य छुं ई सुलं च्वने धुंका आः हाकनं संगीतख्यलय् खनेदयेक वःगु धइगु वयकःया संगीतख्यः प्रतिया मतिना खः धका धयादिल ।

Categorized in कला