zero media family planning adv

म्यानमारय् ५०० म्ह प्रदर्शनकारी सित, सतकय् फोहोर वांछ्वयाः सरकारया विरोध

नेवा: अनलाइन न्युज – ललेन्द्र शाक्य | २०७७ चैत्र १७, मंगलबार १२:४३:२०

सैन्य कूविरुद्ध आन्दोलनरत म्यानमारया नागरिकपिन्सं सतकय् फोहोर वांछ्वयाः विरोध प्वंकूगु दु ।

अवज्ञा आन्दोलन अन्तर्गत म्यानमारबासीपिन्सं मंगलवाःनिसें सतकय् फोहोर वांछ्वयाः विरोध प्वंकेगु सुरु याःगु बीबीसीं जानकारी ब्यूगु दु ।

प्रदर्शनकारीपिन्सं फोहोर वांछ्वयाः जुन्ता सरकारया विरोध प्वंकेत सामाजिक संजालपाखें आह्वान याःगु दु ।

वंगु फेब्रुअरी १ स म्यानमारया सेनां सत्ता ल्हाःतय् काःगु खः । सेनाया उगु पलाः विरुद्ध आन्दोलन जुयाच्वंगु दु ।

आन्दोलनकारीपिन्त सेनां निर्मम दमन याःगु दु । समाचार एजेन्सीया कथं विरोध प्रदर्शनय् आःतक ५०० म्ह मनूत सीधुंकूगु दु ।

सोमवाः जक १४ म्ह मनूत सीगु दु । म्यानमारया सेनां हवाई हमाला तकं याःगु दु । सेनाया दमनया हुनिं म्यानमारबासी नागरिक बिस्युं वनाः थाइल्याण्डपाखे वंगु समाचार एजेन्सं न्ह्यथंगु दु ।

आन्दोलनकारीपिन्सं सतकय् तयातःगु फिं जाःगु बोरात सेनां विशेष कथंया ल्वाभः छ्यलाः चिइकेगु याःगु दु ।

सरकारी टेलिभिजनं रोयट विपनया छ्यलाबुला याःगु न्ह्यथंसां नं बीबीसीं धाःसा उगु ल्वाभः गुज्वःगु कथंया खः धैगु स्पष्ट मजूगु जानकारी ब्यूगु दु ।

थ्वहे झ्वयल् संयुक्त राष्ट्रसंघया महासचिव एन्टोनियो गुटरेसं म्यानमारया सैन्य प्रमुखयात प्रदर्शनय् दमन मयायेत आग्रह याःगु दु ।

Categorized in अन्तर्राष्ट्रिय