नेवा: अनलाइन न्युज – ललेन्द्र शाक्य | २०७७ फाल्गुण १७, सोमबार १२:४४:०३

म्यानमारय् प्रहरीं चलेयाःगु गोली कयाः १८ म्ह जनप्रदर्शनकारीपिनिगु ज्यान वगु दु ।

३० म्हसिबें अप्वः प्रदर्शनकारीपिं घाःपाः जूगु बीबीसीं जानकारी ब्यूगु दु ।

यांगुन, दाबेई व म्यान्डलेलिसेंया थीथी सहरय् जूगु प्रदर्शनय् टियर ग्याँस प्रहार याःबलय् नं प्रदर्शन मद्युबलय् प्रहरीं गोली चलेयाःगु बुखँ बीबीसीं न्ह्यथंगु दु ।

थ्वसिबें न्ह्यः नं जूगु प्रदर्शनय् स्वम्ह प्रदर्शनकारीपिनिगु ज्यान वंगु दु । संयुक्त राष्ट्र संघं सैन्य कू या विरोध प्रदर्शनय् जूगु उगु ज्यादतीयात दकले तःधंगु घातक दिं धाःगु दु ।

म्यानमारय् वंगु फेब्रुअरी १ य् सेनां प्रजातन्त्रवादी नेतृ आ.ग सांग सुकीलिसेंया नेतापिन्त हिरासतय् कयाः सत्ता कब्जा याःगु खः ।

उकिया विरोधय् अन न्हिथं प्रदर्शन जुयाच्वंगु दु । म्यानमारय् दच्छिया नितिं संकटकाल घोषणा याःगु दु । म्यानमारय् सैन्य कू जुइधुंकाः हलिंन्यंकं थुकिया आलोचना व विरोध जुयाच्वंगु दु ।

Categorized in अन्तर्राष्ट्रिय