नेवा: अनलाइन न्युज | २०८० भाद्र २४, आइतबार १२:२७:५७

मोरक्कोय् भुखाय् ब्वयाः सीपिनिगु ल्याः निद्वलं मल्याक्क थ्यनेधुंकूगु दु ।

दकलेअप्वः अमूल्य जीवन दक्षिणी मराकेसय् जूगु अधिकारीपिन्सं धाःगु दु । पर्यटकीयन नगर मराकेससिबें ७२ किलोमिटर दक्षिण पश्चिमय् केन्द्र विन्दु जुयाः शुक्रवाः बहनी ११ः११ ता इलय् ब्वःगु ६.८ रेक्टरस्केलया भुखाय् पाखें विनाश दकले अप्वः मराकेसय् हे जूगु दु ।

शुक्रवाःया शक्तिशाली भुखाचय् लानाः निद्वः व १२ म्ह सीगु व निद्वः व ५९ म्ह घाःपाः जूगु दु ।

गृहमन्त्रालयया कथं घाःपाः जूपिंमध्ये द्वःछि व प्यसःम्हेसिगु अवस्था गम्भीर जूगु दु ।

भुखाचय् लानाः सीपिं व घाःपाः जूपिं बच्छिसिबें अप्वः अलहौज व तारउदान्त प्रान्तया जूगु धासें उगु मन्त्रालयं मराकेस, अगादिर, कासाब्लांका, और्जाजाटे, चिलौवा, अजिलाल व युसुफिया नं अधिक प्रभावित जूगु जानकारी ब्यूगु दु ।

भुखाय्या केन्द्रविन्दु जूगु अलहौज प्रान्तय् दकले अप्वः द्वःछि व निसः व ९३ म्ह सीगु दुसा ४ सय ५२ म्ह ताराउदान्त प्रान्तय् सीगु दु ।

मौले ब्राहिम गामय् नच्चापिं मचापिनिगु सीम्ह खनाः नुगः मछिंकूम्ह ७० दँया बौचारा उद्धारकःमिं छेँ लिक्क हे ५० म्हेसिगु सीम्ह ल्हाकागु धाःगु दु ।

मदिक्क वयाच्वंगु लिभुखाचं ग्याःचिकुइ लाःगु मोरक्कोली सब्बु चान्हय् छेँ त्वःताः बिस्युं वंगु खः । इमिसं निचा छेँ पिने सकतय् ई फुकूगु खः । आः नं अधिकांश मनूत छेँ पिने त्रिपाल ग्वयाः च्वनाच्वंगु दु ।

मराकेस, कासाब्लांक लिसेंया सहरी क्षेत्रया मनूतसें सतकय् चा बितेयाःगु दु । सार्वजनिक थाय्, चोरस्ता एवं डबलीइ इमिसं आश्रय काःगु दु ।
पहाडी क्षेत्रय् जूगु क्षति व हताहतीया विस्तृत विवरण वःगु मदुनि । भुखाचं अति प्रभावित दुर्गम पहाडी गामय् थ्यंकेत सेना व आपतकालीन सेवाया अधिकारी खटेजूगु दु । उद्धार पुचः आवासीय भवनयात भुखाचं भग्नावशेषय् परिणत जूगु थासय् सुं म्वाःपिं लुयावइला धैगुआशय् ब्वां जुयाच्वंगु दु । उद्धारकःमि व पुचःया ल्याः अप्वयेकूगु गृहमन्त्रालयं जानकारी ब्यूगु दु ।

‘जिं फुक्क गुमेयाना’, कलाः व प्यम्ह काय् म्ह्याय् गुमेयाःम्ह मौलेब्राहिमया पहाडी गांया बासिन्दा लाहसेन बर्बरी ख्वबि हायेकाः धाःगु दु ।

उद्धारकःमिपिन्सं लाहसेनया स्वम्ह म्ह्यायपिनिगु सीम्ह छेँया भग्नावेशषपाखें लिकाःगु दु, तर आःतक वया कलाः व कायया सीम्ह लुयावःगु मदुनि ।

‘जिं आः छुं यायेमफु, जि संसारं तापाक्क वने चाहेजू।’ बिलाप यासें वया म्हुतुं अवर्णनीय पीडा अभिव्यक्त जूगु दु ।

भुखाय् प्रभावित छगू गांया छगू थासय् भग्नावेशष चिइकूबलय् १८ म्हेसिगु सीम्ह लिकायेधुंकाः छम्ह ज्येष्ठ मिसा नागरिकं छाती दायाः ख्वःगु लूपाखें उद्धारकःमि व संचारकःमिपिन्त नं भावुक याःगु खः ।

केन्द्रविन्दुसिबें थ्यंमथ्यं ५० किलोमिटर तापाक्क च्वंगु ताफेघटे गामय् छुं छुं भवन जक ल्यनाच्वंगु दुसा अधिकांश ध्वस्त जूगु दु । ७२ दँया ओमर बेन्हानां थः स्वम्ह छय् छुइ व भौछगू हे चिहान जूगु धाःगु दु ।

शनिवाः हे उगु गांया स्थानीयं ७० म्हेसिगु सीम्ह व्यवस्थापन याःगु खः ।

स्वन्हु राष्ट्रिय शोक

मोरक्कोया जुजु मोहम्मद छैटौं नं स्वन्हु राष्ट्रिय शोक घोषणा यासें पीडित छेँजःपिन्त नयेत्वनेगु व च्वनेगु नितिं व्यवस्था ययोत सम्बद्ध निकाययात निर्देशन ब्यूगु दुसा उद्धार पुचःयात ग्वाहालि यायेत देसया राष्ट्रिय सेनायात इनाप याःगु दु ।

राष्ट्रिय शोकया थ्व इलय् सार्वजनिक थाय् व सरकारी भवनय् ब्वयेकातःगु राष्ट्रिय ध्वाँय् बच्छि क्वःछुकेगु सरकारी समाचार समितिं जानकारी ब्यूगु दु ।

थ्वसिबें न्ह्यः सन् १९६९ या भुखाचय् लानाः मोरक्कोय् १५ हजार मनूत सीगु खः । भुखाचं अगादिर तहसनहस जूगु खः ।

Categorized in अन्तर्राष्ट्रिय