मोटरसाईकल दुर्घटनाया फुटेज उपलब्ध याकेत सुरक्षा निकायपाखें इनाप, फुटेज ब्यूम्हेसित सिरपाः
नेवा: अनलाइन न्युज – ललेन्द्र शाक्य | २०७८ बैशाख २२, बुधबार १०:३०:५८
मोटरसाईकल दुर्घटनाया फुटेज उपलब्ध याकेत प्रउ रमेशकुमार बस्नेतपाखें प्रेस वक्तव्य सावर्जनिक यासें फुटेज उपलब्ध याकेत इनाप
येँया अतिकं व्यस्तगु प्रहरीलिसें ट्राफिक प्रहरीया मदिक्क निगरानी दया तुं च्वनीगु थासय् मनू हे सिक्क दुर्घटना जूसां सतक सुरक्षा निकाय नं दुर्घटनाया दोषीपिन्त यदि लुइके मफुत व कारवाही यायेमफुत धाःसा नेपाल सरकारया सतक सुरक्षा निकाय कमजोर जूगु जनसमुदायं तायेकी । अथेहे, यदि दोषीयात ज्वनेमफुत धाःसा उगु सतक सुरक्षा निकाय दःसां मदुसां छुं मपाइगु व उगु सतक सुरक्षा निकाय उच्च ओहोदाया व्यक्तिपिनिगु नितिं जक सीमित जुइगु खँ सम्बन्धित विश्लेषकपिनिगु धापू दु ।
महानगरीय प्रहरी परिसर येँया प्रहरी उपरीक्षक रमेशकुमार बस्नेतं किपूया १० वडा चिथु त्वाःया राजमान महर्जनया मोटरसाइकल दुर्घटनाया फुटेज सुयाके दुसा उपलब्ध याकेत इनाप याःगु दु ।
प्रहरी उपरीक्षक बस्नेतं छगू प्रेस वक्तव्य सार्वजनिक यासें उकथं इनाप याःगु खः । सार्वजनिक याःगु प्रेस विज्ञप्तिइ धयातःगु दु, ‘मिति २०७८ बैशाख १५ गते बुधवाः बहनी थ्यंमथ्यं ७ः०० ता ईनिसें ८ः०५ ता ई दुने कलंकी रिङरोड सीता पेट्रोल पम्प लिक्क बा६५प १५२६ ल्याःया मोटरसाइकलय् सवार राजमान महर्जनयात नम्बर सिइके मफूगु मोटरसाइकलं ठक्कर नकाः ज्यान वंगु सम्बन्धय् उगु इलाकाया सीसीटिभी फुटेजय् तकं रेकर्ड खनेमदूगुलिं उगु घटना जूगु इलय् सुं सुनां खंगु वा मोबाइलं भिडियो कयातःगु वा खिचेयानागु जूसा उपलब्ध याकाः अनुसन्धानय् ग्वाहालि यायेत मिडियापाखें जानकारी बियाच्वना ।’
दुर्घटनाया फुटेज उपलब्ध याकेगु नितिं महानगरीय प्रहरी परिसर येँया प्रहरी उपरीक्षक रमेशकुमार बस्नेतं प्रेस बक्तव्यय् थःगु मोबाइल ल्याः ९८५१०–१७२३७ तकं सार्वजनिक यासें पीडितपाखें मोटरसाइकल दुर्घटनाय् लानाः मदुम्ह राजमान महर्जनया छेँजः आनन्द महर्जनया नां नं सार्वजनिक यानाः महर्जनया मोबाइल ल्याः ९८५१०–१०४०९/९८०२००९२७२ व इमेल Email: ananda@escannepal.com नं सार्वजनिक याःगु दु ।
अथेहे, दुर्घटना लानाः मदुम्ह राजमान महर्जनया छेँजः आनन्द महर्जनं छगू सुचं सार्वजनिक यासें दुर्घटनाया भिडियो फुटेज उपलब्ध याकूपिन्त दुनुगलंनिसें सिरपाः बियाः सम्मान यायेगु जानकारी बियादीगु दु ।
येँया अतिकं व्यस्तगु प्रहरीलिसें ट्राफिक प्रहरीया मदिक्क निगरानी दया तुं च्वनीगु थासय् मनू हे सिक्क दुर्घटना जूसां सतक सुरक्षा निकाय नं दुर्घटनाया दोषीपिन्त यदि लुइके मफुत व कारवाही यायेमफुत धाःसा नेपाल सरकारया सतक सुरक्षा निकाय कमजोर जूगु जनसमुदायं तायेकी । अथेहे, यदि दोषीयात ज्वनेमफुत धाःसा उगु सतक सुरक्षा निकाय दःसां मदुसां छुं मपाइगु व उगु सतक सुरक्षा निकाय उच्च ओहोदाया व्यक्तिपिनिगु नितिं जक सीमित जुइगु खँ सम्बन्धित विश्लेषकपिनिगु धापू दु ।
किपूया राजमान महर्जन निगः मोटरसाइकलया ठक्करपाखें मदुगु अनया स्थानीय बासिन्दापिन्सं धाःगु दु । स्थानीय बासिन्दापिनिगु कथं राजमान महर्जनयात न्हापां छगः मोटरसाइकलं ठक्कर नकाः ग्वारातुइकूगु व हाकनं ल्यूनेपाखें वयाच्वंगु मेगु मोटरसाइकलं क्यलाः बिस्युं वंगु धाःगु दु ।
उगु दुर्घटनाय् लानाः मदुम्ह राजमान महर्जनया छ्यनय् व छातीइ आपालं घाःपाः जूगु अस्पताल श्रोतं जानकारी ब्यूगु खः ।
दुर्घटना जूगु बैशाख १५ गते बहनी खः । सरकारं कोरोना महामारी म्हो यायेगु नितिं बैशाख १६ गतेनिसें लकडाउनया घोषणा याःगु खःसा स्वनिगलय् च्वनाच्वंपिं गांमाःपिन्त स्वनिगः त्वःताः थःथःगु गामय् वनेगु नितिं निन्हुया ई ब्यूगु व सरकारं ब्यूगु वहे ई दुने उपिं गांमाःपिं स्वनिगलं गामय् वनाच्वंगु झ्वलय् स्वनिगःया रिङरोडनिसें सकतां क्षेत्र सवारी जाम जूगु खः ।
सवारी जामया हुनिं दुर्घटनाय् लानाः तच्वकं घाःपाः जूम्ह राजमान महर्जनयात अस्पताल थ्यंकेत अतिकं थाकूगु खँ न्ह्यथंसें मदुम्ह राजमान महर्जनया छेँजः आनन्द महर्जनं जामया हुनिं अस्पताल थ्यंकेत बाघौं (आधा घण्टा) लिपा लाःगु जानकारी ब्यूगु दु । अस्पताल थ्यनेधुंकाः चिकित्सकपिन्सं चेकजाँच याःबलय् सासः जक ल्यंदनीगु धासें घाःपाः जूम्ह राजमान महर्जनया छातीइ पम्प यानाः म्वाकेगु कुतः याःसां अस्पताल थ्यंकेगु लिपा लाःगुलिं मदुगु जानकारी नं आनन्द महर्जनं ब्यूगु दु ।
