2565 buddha Jayanti ADV

मोटरसाइकल दुर्घटना : मांम्ह सित, काय् घाःपाः

नेवा: अनलाइन न्युज – ललेन्द्र शाक्य | २०७८ जेठ २६, बुधबार ११:३४:१७

पूर्वी चितवनया कालिका नगरपालिकाय् जूगु मोटरसाइकल दुर्घटनाय् छम्ह मनू सीगु दुसा मेम्ह घाःपाः जूगु दु ।

जिल्ला प्रहरी ज्याकुथि चितवनया कथं उपरदाङगढीपाखें शक्तिखोरय् वनाच्वंगु ना३६प २१९९ ल्याःया मोटरसाइकल कालिका ९ सुनखानीइ थःथवय् अनियन्त्रित जुयाः दुर्घटना जूगु खः । मोटरसाइलक मंगलवाः बहनी १०ः१० ता इलय् सतकं ५० मिटर क्वय् कुतुंवंगु ज्याकुथिं जानकारी ब्यूगु दु ।

दुर्घटनाय् लानाः सीम्ह इच्छाकामना गाउँपालिका २ च्वनीम्ह ६० दँया हस्तमाया मगर जूगु ज्याकुथिया प्रवक्ता सूर्यबहादुर थापां जानकारी ब्यूगु दु ।

मगरया घटनास्थलय् हे ज्यान वंगु खः । मोटरसाइकल चालक रत्ननगर नगरपालिका ११ च्वनीम्ह ३५ दँया फत्तेबहादुर मगर घाःपाः जूगु खः ।

घाःपाः जूम्ह मगरया निपां तुति, ल्हाः व जँय् घाःपाः जूगु दुसा चितवन मेडिकल कलेजय् वासः जुयाच्वंगु दु । सीम्ह व घाःपाः जूम्ह मां व काय् जूगु थापां जानकारी ब्यूगु दु ।

Categorized in दुर्घटना-अपराध