नेवा: अनलाइन न्युज – ललेन्द्र शाक्य | २०७८ श्रावण २२, शुक्रबार १६:४३:३७

अर्जेन्टिनी सुपरस्टार फुटबल कासामि व बार्सिलोनाया कप्तान लियोनल मेस्सीं क्याटलान क्लब त्वःतूगु दु । बार्सिलोनां बिहिवाः बहनी विज्ञप्ति सार्वजनिक यासें मेस्सी क्लबय् मच्वनीगु पक्का जूगु जानकारी ब्यूगु खः ।

मेस्सी व क्लबदथुइ सम्झौता नवीकरणया नितिं सहमति जूसां नं आर्थिक व ला लिगाया संरचनात्मक पंगःया हुनिं बिहिवाः न्हूगु सम्झौता जुइमफयेधुंकाः मेस्सीं बार्सिलोना त्वःतीगु पक्का जूगु खः ।

जुन ३० निसें क्लब बिहीन जूम्ह मेस्सी आः फ्रि ट्रान्सफरय् मेगु क्लबय् वनी । थ्वसिबें न्ह्यः थीथी विदेशी संचारमाध्यमं मेस्सीं ५० प्रतिशत तलब कटौतीइ न्यादँया न्हूगु सम्झौता यायेगु धयाः वयाच्वंगु खः ।

सन् २००४ य् बार्सिलोनाया सिनियर पुचलय् डेब्यु याःम्ह मेस्सीं क्लबपाखें ७७८ कासा म्हिता ६७२ गोल याःगु खः । बार्सिलोनापाखें १० ला लिगा व ४ च्याम्पियन्स लिगया उपाधि त्याकूम्ह मेस्सीं अर्जेन्टिनापाखें वंगु महिना कोपा अमेरिकाया उपाधि ल्ह्वंगु खः ।

Categorized in कासा