zero media family planning adv

मेलम्चीया लः चैत्रं छेँय् छेँय् थ्यनीगु ः आः २४ घौ हे लः

नेवा: अनलाइन न्युज – ललेन्द्र शाक्य | २०७७ फाल्गुण २६, बुधबार ११:१४:५२

मेलम्चीया लः त्वनेगु स्वनिगःया बासिन्दापिनिगु ताःहाकःगु ईनिसेंया म्हगस आः छुं दिं दुने हे पूवनीगु जूगु दु ।

चैत्र महिनाया निवाःया ईनिसें स्वनिगलय् मेलम्चीया लः वितरण यायेगु धलः तय जूगु मेलम्ची खानेपानी विकास समितिं जानकारी ब्यूगु दु ।

समितिया कार्यकारी निर्देशक तिरेशप्रसाद खत्रीं मेलम्चीया लः त्वनेगु स्वनिगः बासिन्दाया ताःहाकःगु ईनिसेंया म्हगस आः याकनं हे पुवनीगु खँ कंगु दु । वं धाःगु दु, चैत्र निवाःनिसें स्वलातक परीक्षणया रुपं स्वनिगलय् मेलम्चीया लः वितरण यायेगु जुइ । परीक्षण सुथां लायेधुंकाः वितरण ज्या लच्छि दिकाः फूलफेज...य् लः वितरण यायेगु जुइ ।

परीक्षणया रुपं स्वनिगलय् न्हिथं १७ करोड लिटर लः हयेगु व काठमाडौं उपत्यका खानेपानी लिमिटेड (केयूकेएल)या वितरण प्रणालीपाखें लः वितरण यायेगु कार्यकारी निर्देशक खत्रीं जानकारी ब्यूगु दु ।

प्रधानमन्त्री केपी शर्मा ओलीं फागुन २२ गते फ्लसिंग टनेलया हाइड्रो मेकानिकल गेटया बटन तियाः सुन्दरीजलय् मेलम्चीया जलप्रवाहया शुभारम्भ याःगु खः । सिन्धुपाल्चोकया हेलम्बु अम्बाथानय् च्वंगु हेडबक्सपाखें फागुन १०गते थ्यंमथ्यं २७ किलोमिटर ताःहाकःगु सुरुंगय् लः प्रवाह याःगु खः ।

कार्यकारी निर्देशक खत्रीया कथं स्वनिगलय् लः वितरणया नितिं चैत्रया निवाःनिसें सुन्दरीजलय् च्वंगु प्रशोधन केन्द्रय् लः प्वंकी । सुरुंग सफा यायेगु ज्या जूगुलिं आः सुरुंगया लः बागमतीइ प्रवाह याःगु दु । मेलम्चीया लः काठमाडौं उपत्यका खानेपानी लिमिटेडया विद्यमान वितरण प्रणालीइ ल्वाकछ्याइ व नापनापं वितरण जुइ ।

लः वितरणया तयारी पूवन

मेलम्ची खानेपानी आयोजना कार्यान्वयन निर्देशनालयया निर्देशक कमल श्रेष्ठं सुन्दरीजल प्रशोधन केन्द्रपाखें वःगु लः वितरणया नितिं सकतां तयारी पूवनेधुंकूगु जानकारी ब्यूगु दु । श्रेष्ठं धाःगु दु, मेलम्चीया लः वितरणया नितिं आःतक मुक्कं १ हजार १२५ किलोमिटरय् न्हूगु वितरण प्रणालीया विकास याःगु दु । उगु प्रणालीमध्ये २०० किलोमिटरया परीक्षण ज्या क्वचायेधुंकूगु दुसा लः वितरण यायेत तयारी अवस्थाय् थ्यंगु दु ।

निर्देशक श्रेष्ठं धाःगु दु, परीक्षण जूगु २०० किलोमिटर बाहेक ल्यंदूगु फुक्क थासय् केयूकेएलया मौजुदा प्रणालीइ स्वानाः मेलम्चीया लः आपूर्ति यायेगु आयोजनाया आन्तरिक तयारी दु ।

केयूकेएलं सेवा उपलब्ध याकाच्वंगु क्षेत्रमध्ये १ लख १० हजार छेँधुरीइ न्हूगु प्रणालीपाखें आपूर्ति यायेगु योजना दूगुलि ८० हजार छेँधुरीइ धारा जडान याःगु दु । वमध्ये १५ हजार धाराया परीक्षण जुयाः लः आपूर्ति यायेफइगु अवस्थाय् थ्यनेधुंकूगु श्रेष्ठं धाःगु दु ।

न्हापांगु चरण अन्तर्गत नरेफाँटलिसें येँ व यलया चक्रपथ दुनेया १ लख १० हजार छेँधुरीयात लः वितरण यायेगु ज्याझ्वः आयोजनाया दु ।

निगूगु चरण अन्तर्गत ख्वपलिसें येँ व यलया चक्रपथ पिनेया क्षेत्रय् मेलम्चीया लः वितरण यायेगु ज्याझ्वः दूगु निर्देशक श्रेष्ठं धाःगु दु ।

पाइप लायेगु ज्या क्वचाल

आयोजनाया न्हापांगु चरण अन्तर्गत १ हजार १५० किलोमिटरय् पाइप लायेगु ज्या क्वचायेधुंकूगु दु । निगूगु चरणय् पाइप लायेगु नितिं ठेक्का सम्झौता जुयाः निर्माण कम्पनीं कार्यादेश कायेधुंकूगु निर्देशक श्रेष्ठं धाःगु दु ।

निगूगु चरण अन्तर्गत थ्यंमथ्यं ८ सय किलोमिटर पाइप लाइगु जूगु दु । वंगु असोजय् सम्झौता जूगु निगूगु चरणया कार्यावधि स्वदँया नितिं खः ।

२४ घौ हे लः

धाराय् २४ घौ हे लः वइगु कथं मेलम्चीया लः वितरण यायेगु आज्जु आयोजनाया दूगु मेलम्ची खानेपानी आयोजना कार्यान्वयन निर्देशनालयया निर्देशक श्रेष्ठं जानकारी ब्यूगु दु ।

श्रेष्ठं धाःगु दु, न्ह्याग्गु इलय् नं धाराय् लः वइगु कथं प्रणालीया विकास याःगु दु । वहे कथं पाइपय् लः छ्वइ । तर छुं दँ थुखे स्वनिगःया बासिन्दापिंके म्हो लः छ्यलाबुला यायेगु बानीया विकास जुइधुंकूगु आःया अवस्थाय् पाइप लाइनय् प्रवाहर याःगु लः लिहाँ वइगु, ओभर फ्लो जुइगु, लःया चापं पाइप तःज्याइगु, भल्ब चेम्बरपाखें लः पिहाँवइगुथें जाःगु समस्या वइगु खण्डय् धलः कथं लः वितरण याइ ।

स्वनिगलय् त्वनेगु लः वितरणया नितिं सन् १९७२ निसें लःया सम्भाव्य स्रोतया पहिचानया नितिं अध्ययन ज्या न्ह्याकूगुलि सन् १९८४ स जूगु अध्ययनं स्वनिगलय् त्वनेगु लः समस्याया दीर्घकालीन समाधानया नितिं मेलम्ची, यांग्री व लार्के हे धकाः निष्कर्ष लिसें निर्माण प्रक्रिया न्ह्यःने यंकूगु खः ।

Categorized in बजाः