ad prabhu

मेयर शाक्य व उपमेयर श्रेष्ठपाखें स्मार्ट ट्वाइलेट उलेज्या

नेवा: अनलाइन न्युज | २०७७ मङ्सिर ५, शुक्रबार २१:००:४४

येँ महानगर पालिकाया मेयर विद्यासुन्दर शाक्य व उपमेयर हरिप्रभा खडगी श्रेष्ठपाखें  स्वयम्भूया बुद्धपार्कया द्यःया ल्यूने दयेकूगु स्मार्ट ट्वाइलेट व स्यानिटरी प्याड मेशिनया उलेज्या  शुक्रवाः यानादीगु दु । 

उगु उलेज्या ज्याझ्वलय् महानगरपालिकाया मेयर भाजु शाक्यं समय नाप नापं न्ह्याःवनेत विश्वय् गुकथंया विकास जुया वयाच्वन उकथंया प्रविधि नेपालय् नं दुत हयाः उकथं झी नं न्ह्याःवनेमाःगु खँ कनादीगु दु । वय्कलं थःगु खँ तय्गु झ्वलय् मनूतसें गबलें थ्व याय् माल धकाः डेलिगेशन वइगु व गवलें थ्व याय् मजिल धकाः दबाव व बिउ वइगुलिं जनता या हित जुइगु विकासया ज्या यायेत थाकुया च्वंगु खँ कनादीगु दु । वयकलं आः झीपिं नं स्मार्टकथं न्ह्यावनेगु पाखे स्वय्माःगुलिइ नं वयकलं बः बियादीगु दु ।  

थुकथं हे उगु उलेज्याझ्वलय् झीसं वातावरण बालाइगुकथंया ज्या याना वनेमाःगु खँय् बः बियादिसें थौं स्वय्म्भूइ स्मार्ट ट्वाइलेट दयकेगु ज्या याना स्वयम्भू चाह्यू वइपिं विदेशी व स्वदेशीतयत गाक्कं ग्वाहालि जूवनिगु खँ कनादीगु दु । नापं वयकलं थःपिनि छेँ दना बलय् आकाशं वइगु लःयात तकं व्यवस्थापन यानागु खँ लुमंका दिल । 

येँ महानगरपालिका १५ वडाया नायो एवं महानगरया प्रवक्ता ईश्वर मान डंगोलया सभापतित्वय् न्ह्याःगु उगु ज्याझ्वलय् न्हूगु दयकूगु ट्वाइलेटया विशेषतायात कःघाना लसकुस न्वचु बियादिल । वयकलं थःगु खँ तयेगु झ्वलय् स्मार्ट शौचालय भवनय् दयमाःगु आधारभूत खँत सकतां दुगु खँ कनादिल । 

उगु ज्याझ्लय् सभापतिया रुपय् १५वडाया नायो ईश्वर मान डंगोलं १५ वडा दुने विकासया ज्या आपालं जूगु खँ कनादीगु दु । स्थानीय, प्रदेश व संघीयया जनप्रतिनिधिपिनिगु समन्वय याना बजेत हया ज्या न्ह्याकागु खँ  नं वयकलं  कनादिल । वय्कलं थुगु आर्थिक दँय् जक थ्व स्वंगुलिं सरकारपाखें करीब ८० करोड दांया विकासया ज्या जूगु खँ नं कनादिल । वयकलं थुगु स्मार्ट ट्वाइलेटय् वालय् छकः थःम्हं नं सफा याः वय्गु खँ कनादीगु दु । थीथी वडाया वडानायो व जनप्रतिनिधिया लिसें महानगरया थीथी विभागया प्रमुखपिनिगु नं उपस्थिति दुगु थुगु ज्याझ्वः बचाः हाकः जक याना न्ह्याकुगु खःसा ज्याझ्वलय् महानगरपालिका या शहरी योजनाया कजि मनराजा रन्जित व शौचालय व्यवस्थापनया जिम्मा कागु संस्था एरोशानया प्रकाश अमात्यं नं नुगःखँ तयादीगु खः ।

 

Categorized in स्थानिय-समाज