kmc bidya

मेयर शाक्यपाखें सुनचाँदी व्यवसायी संघया तालीम भवन उलेज्या

नेवा: अनलाइन न्युज – ललेन्द्र शाक्य | २०७६ फाल्गुण १, बिहिबार १४:०५:३९

येँ महानगरपालिकाया मेयर विद्यासुन्दर शाक्यं काठमाडौं सुनचाँदी व्यवसायी संघं तिसाज्वलं दयेकेगु तालीम भवनया शिलान्यास यानादीगु दु ।

थौं बिहिवाः सुथय् येँ महानगरपालिका २५ वडाय् लाःगु कुसुमबियालाछी झ्वाःबहालय् थथे तालीम भवनया शिलान्यास जूगु खः ।

येँ महानगरपालिकाया उपमेयर हरिप्रभा श्रेष्ठ खड्गी, २५ वडाया वडाध्यक्ष नीलकाजी शाक्य, १७ वडाया वडाध्यक्ष नवीन मानन्धरलिसें थीथी व्यक्तित्वपिनिगु उपस्थितिइ उगु तालीम भवन शिलान्यास जूगु खः ।

काठमाडौं सुनचाँदी व्यवसायी संघया नायः महेन्द्ररत्न शाक्यं लुँ वहःलिसें थीथी तिसाज्वलं दयेकेगु तालीमया आवश्यकता जूगुलिं नमूना तालीम केन्द्र कथं थथे भवन दयेकेगु ज्या जूगु खँ तयादीगु दु । वय्कलं लुँ वहः क्षेत्रय् आवश्यक जनशक्तिया विकास, सीप व व्यावसायिक क्षमताया पूर्वाधारया नितिं थथे नमूना प्रशिक्षण केन्द्र निर्माण यायेत्यनागु खँया जानकारी नं बियादीगु दु ।

नेवाः अनलाईनन्यूजलिसे खँ ल्हासें भाजु शाक्यं दक्ष जनशक्ति उत्पादन यानाः स्वरोजगारया समस्या समाधान यायेगु नितिं नं थुगु योजना महत्वपूर्ण जुइगु खँ कनादीगु दु ।

परियोजनाया लक्ष्य कथं वइगु आर्थिक दँया दुने सच्छिम्हेसित प्रशिक्षण बिइगु व उकी २० म्ह उत्कृष्ट प्रशिक्षार्थीपिन्त मेगु प्रशिक्षण ज्याझ्वलय् स्वतः प्रशिक्षक व तालीम बिइम्ह व्यक्ति कथं नियुक्ति यायेगु व तालीम काइपिं प्रशिक्षार्थीपिं अपांगपाखें १० प्रतिशत, मिसापाखें १५ प्रतिशत, ल्यूने लाःपिं व जनजातिपाखें १५ प्रतिशत, परम्परागत पेशाय् आवद्धपाखें ६० प्रतिशत कायेगु खँया जानकारी नं भाजु शाक्यं बियादीगु दु ।

Categorized in लजगाः