1142 nhoo dan adv

मू प्रशिक्षक अल्मुताइरीं तल स्वदँया सम्झौता पतिं ल्हाःचिं

नेवा: अनलाइन न्युज – ललेन्द्र शाक्य | २०७८ कार्तिक १६, मंगलबार १४:०७:४३

नेपाली राष्ट्रिय फुटबल टिमया मू प्रशिक्षक अब्दुल्लाह अल्मुताइरीं स्वदँया सम्झौता पतिइ ल्हाःचिं तःगु दु । आः अल्मुताइरी सन् २०२४ तक राष्ट्रिय टिमया मू प्रशिक्षक जुइ ।

मू प्रशिक्षक अल्मुताइरीया कथं १ नोभेम्बरनिसें न्ह्याःगु न्हूगु सम्झौता २०२४ या अन्त्यतक कायम जुइ । वं न्ह्यःने धाःगु दु, ‘जिमिसं बांलाःगु फुटबलया नितिं बांलाःगु लकस (वातावरण) दयेकेते सहलह यानागु दु । यक्व खँ मेगु मिसा लिग न्ह्यायेधुंकाः प्रष्ट जुइ ।’

माल्दिभ्सय् जूगु साफ च्याम्पियनसिपया फाइनल कासा म्हितेन्ह्यः अल्मुताइरीं नेपाः त्वःतेगु घोषणा याःगु खः । तर, अखिल नेपाल फुटबल संघ (एन्फा)या नायः कर्मा छिरिङ शेर्पां कतार थ्यंकाः नापलाःगु लिसें कतार फुटबल एशोसिएसनलिसे जूगु सहलह लिपा मू प्रशिक्षक अल्मुताइरी न्हूगु सम्झौताया नितिं सहमत जूगु खः ।

परीक्षण काल पूवंकागु धासें मू प्रशिक्षक अल्मुताइरीं मिलेजुयाः फुटबल विकासय् ज्या याये चाहेजूगु धाःगु दु । ‘जि प्रशिक्षक खः, फुटबलय् ज्या याये चाहेजू’, अल्मुताइरीं धाःगु दु ।

तर थःगु व्यक्तिगत जीवनयात कयाः टिकाटिप्पणी मयायेत वं आग्रह याःगु दु । मू प्रशिक्षक अल्मुताइरीं न्ह्यःने धाःगु दु, ‘जिं छु पुना, गुज्वःगु सँ स्टाइल याना, जिगु जीवनबारे न्वःवानादीमते । जिगु ज्याय् छुं दुसा धयादिसँ ।’

Categorized in कासा