1142 nhoo dan adv

मुस्ताङय् च्वापु चलः, बिस्युं जुयाः ९ म्ह घाःपाः

नेवा: अनलाइन न्युज – ललेन्द्र शाक्य | २०७८ कार्तिक २८, आइतबार १५:०४:२३

मुस्ताङया कोबाङ क्षेत्रय् च्वापु चलः (हिमपहिरो) कुतुं वःगु दु । आइतवाः न्हिनय् मानापाथी हिमालपाखें तःधंगु च्वापु चलः कुतुंवःगु मुस्ताङया प्रहरी प्रमुख डिएसपी रामकुमार दानीं जानकारी ब्यूगु दु ।

च्वापु चलःया हुनिं छुं नं क्षति जूगु वा मजूगु पुष्टि जूगु मदुनि । उगु क्षेत्र जिल्ला सदरमुकामं २५ किलोमिटरसिबें अप्वः तापाःगु व प्रहरी पुचः उखेपाखे थ्यंकूगु डिएसपी दानीं जानकारी ब्यूगु दु ।

च्वापु चलःया ग्याःचिकुं बिस्युं जुयाः ९ म्ह घाःपाः जूगु दु । च्वापु चलः कुतुंवयेधुंकाः बिस्युं वनाः मानापाथी हिमालया फेदी थासाङ गाउँपालिका २ या जनआदर्श माविया शिक्षक व विद्यार्थीपिं घाःपाः जूगु प्रहरीं जानकारी ब्यूगु दु ।

च्वापु चलः कुतुंवयेधुंकाः उकिया लिच्वःपाखें बचेजुइत बिस्युं जूपिं ९ म्ह सामान्य घाःपाः जूगु व इमित जिल्ला अस्पतालपाखे हःगु डिएसपी दानीं जानकारी ब्यूगु दु ।

लिक्क च्वापु चलः कुतुंवयेधुंकाः बिस्युं जूसां नं विद्यालय दुने लिच्वः लाःगु मदु ।

Categorized in दुर्घटना-अपराध