मुलुक बचेयायेगु उपाय संसदीय व्यवस्थाया अन्त्य व मृत्युदण्डया व्यवस्था हे खः – डा. दीक्षित
नेवा: अनलाइन न्युज – ललेन्द्र शाक्य | ने.सं. ११४४ सिल्लाथ्व दुतिया
नागरिक अभियन्ता डा. सुन्दरमणि दीक्ष्तिं कानूनय् मृत्युदण्डया व्यवस्था अनिवार्य जुजुं वनाच्वंगु धाःगु दु । डा. दीक्षितं भ्रष्टाचार नियन्त्रण यायेत मृत्युदण्डया व्यवस्था यायेमा:गु व उकिं याना: भ्रष्टाचार यायेत मनूत ग्याइगु धाःगु दु ।
सरकारं देय् व जनताया पक्षय् सिबें नं थःपिनिगु नितिं जक ज्या यानाच्वंगु डा. दीक्षितया दाबी दु ।
डा. दीक्षितं भुटानी शरणार्थी प्रकरणय् नं निष्पक्ष छानविन मजूगु धासें आक्रोश प्वंकूगु दु ।
डा. दीक्षितं आःया सरकारं छगू फाइल चायेकीगु व उकियात छुं ई लिपा मेगु फाइल चायेकाः ओभरल्यापिङ यानाच्वंगु धाःगु दु ।
सरकारं सुरु याःगु भ्रष्टाचारविरोधी ज्या आःतक छुं नं निष्कर्षय् मथ्यंगु डा. दीक्षितया दाबी दु ।
संसदीय व्यवस्थाय् दां, गुण्डागर्दीया भरय् चुनाव त्याकीगु प्रवृत्ति दूगु डा. दीक्षितया धापू दु । संसदीय व्यवस्था हे गलत जूगु वया दाबी दु ।
नेपाःया परिवेशय् संसदीय व्यवस्था पायछि मजूगु डा. दीक्षितं धाःगु दु । लोकतन्त्रय् आ: ‘म’तन्त्रया हाबी जुयाच्वंगु डा. दीक्षितया दाबी दु । भ्रष्टाचार अन्त्य यायेगु नितिं संसदीय व्यवस्थाया अन्त्य व मृत्युदण्डया व्यवस्था दूगु कानून हयेमाःगु डा. दीक्षितं धाःगु दु ।
गगन थापाथें जाःम्ह नेतां तकं भ्रष्टाचारविरुद्धया अभियानय् छुं यायेमफूगु डा. दीक्षितया दाबी दु । वं गगनं संसदय् व पार्टीया थीथी फोरमय् भ्रष्टाचारविरुद्धय् न्वःवानाच्वंगु जूसां नं वसिबें च्वय् च्वंपिं नेतापिं भ्रष्ट जूगु हुनिं वया भ्रष्टाचारीविरोधी सः सम्बोधन मजूगु डा. दीक्षितं धाःगु दु ।
कम्युनिष्ट पार्टीतसें डेमोक्रेशी स्वीकार मयाःगु वया धापू दु । देसय् डमोक्रेशी स्वीकार याःगु नेपाली कांग्रेस आः ‘भाई माओवादी’ जूबलय् डेमोक्रेशीइ खतरा अप्वःगु डा. दीक्षितं धाःगु दु ।
डा. दीक्षितं धाःगु दु, ‘थ्व डेमोक्रेशीइ पां पालीगु पार्टी जूगु थौंया दिनय् कांग्रेस हे खः । कांग्रेसं हे डेमोक्रेशी बचेयायेमाःगु खः । थौं व कांग्रेस भाई माओवादी जुयावन, देउवां दोहोरे यानाः यंकाच्वंगु दु । कांग्रेस डेमोक्रेशीया थां जुइमाःगु खः तर भाई माओवादी जुयाच्वंगु दु ।’
जनतां ब्यूगु मतया आधारय् कांग्रेसं शासन यायेखनेमाःगुलि आः माओवादीं नेतृत्व कयाच्वंगु धासें डा. दीक्षितं उकियात नं भ्रष्टाचारया रुपं कायेमाःगु धाःगु दु ।
जनताया मतया कदर मजूगु नं भ्रष्टाचारया रुपं कायेमाःगु डा. दीक्षितया धापू दु ।
थःपिन्सं भ्रष्टाचारया विरोध याःबलय् प्रतिगामीया द्वपं सहयायेमाःगु वं धाःगु दु । आःया दलतय्गु हे हुनिं आः जुजुपाखे लहर सुरु जूगु डा. दीक्षितं धाःगु दु ।
Categorized in राजनीति
