dudha jayanti 2568

मुखः अस्तमिया दिं पशुपतिइ नामसंगीति पाठ याइगु

नेवा: अनलाइन न्युज – ललेन्द्र शाक्य | २०८० मङ्सिर ३, आइतबार १४:२२:५६

बज्रयान धर्मया तःधंगु पाठ कथं कयातःगु नामसंगीति दकले न्हापांगुखुसि पशुपति दुने पाठ याइगु जूगु दु ।

मुखः अस्तमिया दिं कन्हय् सोमवाः थथे पशुपति दुने नामसंगीति पाठ ब्वनेगु ज्याझ्वः आर्य मञ्जुश्री नामसंगीति स्तोत्र खलकं यायेत्यंगु खः । थुगु खलः येँया थीथी विहारया मंकाः कथं नीस्वनातःगु खः ।

उगु खलःया कजि गौतमरत्न बज्राचार्यं नेवाः अनलाइनन्यूजयात ब्यूगु जानकारी कथं कन्हय् सोमवाः मुखः अस्तमिया दिं महाद्यःयात मुखः पुइकीगु धार्मिक महत्वया दिं जूगुलिं थुगु दिंया लसताय् पशुपति दुने हे नामसंगीति पाठ यायेत्यंगु खः ।

बज्राचार्यं पशुपतिया पुजारीपिंनाप थ्व विषयस ताःई खँल्हाबल्हा ब्याकाः पशुपति द्यःयात मुखः अस्तमिया दिं मुखः पुइकीगु महत्वयात थुइकेगु ज्या यायेधुंकाः थथे पशुपति दुने हे नामसंगीति पाठ यायेगु ज्याझ्वः तयागु खँ कनादीगु दु ।

येँ दुने क्वःने लागाय् व थःने लागाय् लय् लय् पतिकं थीथी विहारय् नामसंगीति पाठ यायेगु धार्मिक ज्याझ्वः जुयाच्वंगु दु ।

वंगु मंसीर १ गते थःने लागाया गुरुजुपिन्सं सबलबहालय् नामसंगीति पाठ याःगु खःसा मेगु ला पुस १ गते तेबहालय् नामसंगीति पाठ यायेगु ज्याझ्वः तयातःगु दु ।

Categorized in स्थानिय-समाज