prabhu baink new

मीस नेवाः ज्याझ्वःयात ग्वाहालि यानादिसँः हेमा मानन्धर

(११ क्वःगु मीस नेवाः ज्याझ्वः थ्वहे वइगु फागुन ११ गते येँया प्रज्ञाभवनय् तःजिक जुइत्यंगु दु । वंगु झिदँ न्ह्यःनिसें मद्दिक्क दँय्दसं न्ह्याकाः वयाच्वंगु मीस नेवाः ज्याझ्वः नेप्लिज फेशन होमया नकिं मय्जु हिमा मानन्धरं यानाः वयाच्वंगु खः । मय्जु मानन्धर दोलखा जिल्लायाम्ह खःसा वय्कलं येँय् च्वनाः थुकथंया नेवाः ख्यलय् बिस्कंया ज्याझ्वः न्ह्याकाः वयाच्वंगु खः । नेवाः अनलाइनन्युजं वय्कःलिसे यानागु बःचाधंगु खँल्हाबल्हाः थन न्ह्यब्वयाच्वना । –सं.)

मीस नेवाःया तयारी गुकथं जुयाच्वंगु दु ?

तयारी बांलाक्क हे जुयाच्वंगु दु । थ्वपालय् २२ म्ह मिसामचापिन्सं ब्वति काःगु दु । उकीमध्ये स्वनिगःया मिसामचात अप्वः दुसा धरानया छम्ह दु । मीस नेवाः फाइनल कासा थ्वहे वइगु फागुन ११ गते तःजिक यायेगु नितिं सकलसिगु पाखें फूचाःगु ग्वाहालिया आशा यानागु दु ।

झिदँ न्ह्यःनिसें मीस नेवाः ज्याझ्वः यानाः उपलब्धि छु जुलथें च्वं ?

दकले तःधंगु उपलब्धि ला झी नेवाः मिसामचातय्सं झीगु धर्म संस्कृति, परम्परा छु खः धैगु ध्वाथुइकेगु ह्वताः मीस नेवाःपाखें चूलाःगु दु । अथेहे, थःगु प्रतिभा ब्वयेगु ह्वताः थुकिं चूलाकाब्यूगु दुसा थ्वहे प्रतिभा ब्वयाः थःगु जीवन सुथां लाक्क न्ह्याकेगु लँपु नं थुकिं चायेकाः ब्यूगु दु ।
छिथाय् वइपिं (मीस नेवाःलय् ब्वति कायेत वइपिं) मिसामचातसें नेवाः भाय् उलि खँ मल्हाः धैगु दु, छु खः ?
खः, मीस नेवाःलय् ब्वति काइपिं मिसामचात अप्वः नेवाः भासं खँ ल्हाये मसः । थुकी जिं छु यायेफइ । थःगु भाषा त्वःते मज्यू थ्व खँ मांअबुपिन्सं थः मचातय्त मचांनिसें स्यनातये माःगु खः । थथे स्यने मफूगु हुनिं नेवाः भाय् ल्हाइपिं म्हो जुजुं वंगु खः । थुकिया च्यूताः जितः नं दु ।

थथे जूगुया ल्यूने छता हुनि नेवाः भाय् थाय् स्वयाः विविधता दूगु हुनिं यानानं जुइफु । जि हे दोलखायाम्ह, जिं दोलखा भाय् ल्हात धाःसा थनच्वंपिन्सं मथू । अथेहे, पाल्पाय् च्वंम्ह नेवाःनं पालुभाय् न्वःवात धाःसा झीसं मथू । उकिं न्ह्याम्ह न्ह्याथाय् च्वंम्ह जूसां झी गन वना, अनया भाय् सयेकेमाः । जिं ला मीस नेवाःलय् ब्वति काइपिं मिसामचातय्त ४५ न्हु (लत्या) नेवाः भाय्या क्लास कायेकाः च्वनागु दु ।

आःतक मीस नेवाः जुइधुंकूपिं १० म्ह मिसामचातय्गु भविष्य गथे जुयाच्वंगु दु ?

मीस नेवाः जूपिं १० म्हं मिसामचात थःथःगु ज्या यानाः नयाच्वंगु दु । फुक्कसिगु क्यारियर बांलानाच्वंगु दु । मीस नेवाः जुयादीम्ह सुप्रिया तुलाधर छम्ह बांलाःम्ह एंकर खःसा अथेहे सुनिता डंगोल छम्ह बांलाःम्ह समाजसेवी, आकाशा बज्राचार्य छम्ह बांलाःम्ह शिक्षाविद् जूगु दु । मेपिं नं थःथःगु थासय् बांलाःपिं व्यक्ति जुयाः ज्या सनावयाच्वंगु दु ।


मीस नेवाः ज्याझ्वःयात नेवाः समाजं गुलि ग्वाहालि यानाच्वंगु दु ?
नेवाः समाजपाखें स्वयां अप्वः जिं स्वयेबलय् गैरनेवाःतसें झीगु संस्कृति, परम्पराया महत्व थूगुलिं खःला, इमिसं ग्वाहालि यानाच्वंगु दु । नेवाः समाजपाखें म्हतिं नं थ्व ज्याझ्वः बांलाः, जिमिसं गुकथं फु उकथं ग्वाहालि याये धकाः बचं जक ब्यूसां नं तःधं । उकिं जिमिगु आग्रह नेवाः समाजयात थुलि हे दु कि, छिक्पिन्सं गुकथं फु उकथं ग्वाहालि यानादिसँ । छिक्पिनिगु मतिना व हःपाः जिमिगु नितिं दकले तःधं ।

मीस नेवाः ज्याझ्वःयात ग्वाहालि हे यायेमाल धाःसा गुकथं ग्वाहालि यायेगु ?

दकले न्हापां ला, ११ क्वःगु मीस नेवाः ज्याझ्वलय् ब्वति कयाच्वंपिं २२ म्ह मिसामचातय्त छिक्पिन्सं

छु फु उकथं गिफ्टह्याम्पर छता छता बियाः मतिनाया चिं कथं लःल्हानादीफु । मीस नेवाः जूम्हेसित जिमिगुपाखें थुलि तका दां बिइगु धकाः घोषणा यानादीफु । मेता ग्वसाः खलःयात तःधंगु चीधंगु स्पोन्सर यानादीफु ।

मीस नेवाः ज्याझ्वः यायेगु विचाः १० दँ न्ह्यः छितः गुकथं वल ?

१० दँ न्ह्यः जितः झीगु संस्कृति, परम्परा, कला, भाषा, साहित्य थ्व सकतां धनीगु जाति धैगु खँ थुइकाः थुुकियात न्हूगु पुस्ताथ्यंक ल्यंकाः तयेगु नितिं थ्व ज्याझ्वः यायेगु विचाः वःगु खः । उबलेनिसें जिं थ्व ज्याझ्वः आःतक मद्दिक्क यानाः वयाच्वना । थ्व ज्याझ्वः पाय्छिगु ज्याझ्वः खः धैगु पुष्टि नं जुजुं वंगु दु । मीस नेवाः लिपा मीस शेर्पा, मीस तामाङ, मीस आर्यन, मीस मंगोलियन ज्याझ्वः नं यायेगु परम्परा न्ह्यात । थुकिं छु क्यं धायेबलय् जिं १० दँ न्ह्यः यानागु मीस नेवाः ज्याझ्वः पाय्छिगु ज्याझ्वः खः धैगु प्रमाणित याःगु दु । थुकथंया मेगु ज्याझ्वःयात जिं सकारात्मकरुपं स्वयागु दु । उकिं नेवाः समाजं मीस नेवाः ज्याझ्वःयात उकथं हे सकारात्मकरुपं स्वयाः ग्वाहालि याइ धैगु भलसा कयाच्वना ।