nepal investment baink

मिसा साहित्यकार मुनाया न्हूम्ह नायः बिमलप्रभा बज्राचार्य

नेवा: अनलाइन न्युज – विजयरत्न | नेपाल संवत ११४४ तछलाथ्व पंचमी (२०८१ जेष्ठ २९ गते) मंगलवाः

नेपालभाषाया साहित्यिक संस्था मिसा साहित्यकार मुनाया न्हूगु ज्यासना पुचः ल्यज्या जूगु दु  ।  

उगु ल्यज्यां साहित्यकार विमलप्रभा बज्राचार्ययात नायः ल्यःगु दु ।

ल्यज्या जुइन्ह्यःया न्वकू दिव्या ताम्राकारं लसकुस न्वचू बियादीगु उगु मुँज्याय् न्हूम्ह नायः बिमलप्रभा बज्राचार्यपाखें निवर्तमान नायः अन्जना ताम्राकारयात सुभाय् पौ व निर्वाचन अधिकृत जुयादीम्ह संस्थाया सल्लाहकार एवं साहित्यकार ध्रुव मधिकःमियात लुमन्ति चिं लःल्हानादीगु खः । नापं न्हूगु ज्यासना पुचःया दुजःपिन्त व साधारण दुजःपिन्त जिवंकाःछि दुजःया दसिपौ लःल्हायेगु ज्या जूगु खः ।

सर्वसम्मतं निर्वाचित जुयादीपिं न्हूगु ज्यासना पुचलय् छसिंकथं नायः बिमलप्रभा बज्राचार्य, न्वकू दिव्या ताम्राकार, न्वकू बिमला मानन्धर, मूछ्याञ्जे दिब्या बज्राचार्य, छ्याञ्जे भवानी तुलाधर, दांभरी रिता महर्जन व ल्यूदांभरी रेणु श्रेष्ठपिं ल्यज्या जूगु खः ।

अथेहे साधारण दुजलय् राजेश्वरी राजोपाध्याय, पूर्णिमा डंगोल, मिलन शाक्य, मिमला शर्मा, मिनर्वा शर्मा, अर्चना शाक्य व दीपना शर्मा च्वनादीगु दु ।

नुगःखँ तयेगु झ्वलय् निवर्तमान नायः अन्जना ताम्राकारं न्हूगु ज्यासना पुचःयात भिंतुना बिसें मिसा साहित्यकार मुनाया निर्वाचन प्रक्रिया बारे गुकथं जुल धयागु खँ ध्वाथुइक कुलादीगु खः । साहित्यकार मधिकःमिं साहित्यया थीथी विधाय् ल्हाः न्ह्याःपिं मिसा च्वमिपिं दुथ्यानाच्वंगु थुगु संस्थां आः न्हून्हूगु ज्याझ्वः यानाः यंकेमाःगु, थःपिसं यानागु ज्याया दस्तावेज दुथ्याकाः पत्रिका पिथनेमाःगु व मेमेगु साहित्यिक संस्थानाप सहकार्य यानाः न्ह्याःवनेमाःगु खँय् बः बियादीगु खः ।

पुलांम्ह मूछ्याञ्जे मानन्धरं नव निर्वाचित मूछ्याञ्जे बज्राचार्ययात संस्थाया माईन्युट व दस्ताबेज लःल्हासें मिसा साहित्यकार मुनाया नीस्वना बारे दुग्यंक कनादीगु खः ।

न्वचू बीगु झ्वलय् नायः बिमलप्रभा बज्राचार्यं संस्थायात धिसिलाकाः यंकेगु ज्याय् सकसिगुं गुहालि दै धयागु भलसा दु धयादीगु खः । थुगु ज्याझ्वः दुजः पुर्णिमां न्ह्याकादीगु खः ।

Categorized in नेवाः