newayatataad 2

मिसामचा हत्या याःगु द्वपनय् गिरफ्तारीइ लाःम्ह मनूया छेँय् मिँ तल

नेवा: अनलाइन न्युज – ललेन्द्र शाक्य | २०७७ मङ्सिर ९, मंगलबार १२:२५:४८

महोत्तरीया बर्दिबास नगरपालिका १४ वडाया खुदँ दुम्ह मिसामचा बलात्कार हत्या द्वपनय् गिरफ्तारीइ लाःम्ह मनूया छेँय् अनया स्थानीय बासिन्दापिन्सं मिँ तयाब्यूगु दु ।

मिसामचाया हत्या द्वपनय् गिरफ्तारीइ लाःम्ह गौशाला नगरपालिका ५ या २५ दँया अरुणकुमार साहया बर्दिबास नगरपालिका १४ स च्वंगु छेँय् स्थानीय बासिन्दां तोडफोड यानाः मिँ तयाब्यूगु खः ।

मिँ स्यायेत दमकल वःसां नं स्थानीय बासिन्दापिन्सं लँपु हे अवरुद्ध याःगु हुनिं दमकल मिँ च्याःगु थासय् तक थ्यंके मफूगु खः । घटनास्थलय् प्रहरी व सशस्त्र प्रहरी परिचालन याःगु दु ।

मिसामचा बलात्कार हत्याया विरोध यासें स्थानीयपिन्सं महोत्तरीया बर्दिवास नगरपालिकाय् च्वंगु पूर्वपश्चिम राजमार्ग अवरुद्ध याःगु दु । राजमार्ग अवरुद्ध जूबलय् सवारीसाधनपिनिगु लाइन हे जूगु खः ।

मिसामचाया सीम्ह बोराय् तयाः वांछ्वयातःगु अवस्थाय् लुयावयेधुंकाः हत्याया द्वपनय् गिरफ्तारीइ लाःम्ह साहयात इलाका प्रहरी ज्याकुथि बर्दिबासं नियन्त्रणय् काःगु खः ।

बर्दिबास नगरपालिका १४ निवासी सहीद आलमया खुदँ दुम्ह म्ह्याय् गुलाब साह खातुनया सीम्ह बोराय् प्वःचिनातःगु अवस्थाय् सोमवाः सनिलय् छेँ लिक्क लुयावःगु खः । व आइतवाः सनिलनिसें बेपत्ता जूगु खः ।

बर्दिबासय् किराना पसः संचालन यानाm वयाच्वंम्ह अरुणकुमार साह नं मिसामचाया बलात्कार व हत्या थःम्हं यानागु धाःगु खः । उकिया जानकारी वयेखतं प्रहरी वयात गिरफ्तार याःगु खः ।

Categorized in दुर्घटना-अपराध