zero media family planning adv

मिसामचायात सामूहिक बलात्कार याःपिं प्यम्ह गिरफ्तार

नेवा: अनलाइन न्युज – ललेन्द्र शाक्य | २०७७ बैशाख २, मंगलबार १७:५६:५४

कैलालीइ छम्ह मिसामचा सामूहिक बलात्कारया शिकार जूगु दु । घटना लिपा बलात्कारय् दुथ्याःगु द्वपनय् प्यम्हेसित प्रहरीं गिरफ्तार याःगु दु ।

कैलाली जिल्लाया गौरीगंगा नगरपालिका १ वडाया १७ दँया मिसामचायात सामूहिक बलात्कार याःगु खः ।

थःथितिपिन्त नापलानाः वंगु बहनी लिहाँ वयाच्वंम्ह मिसामचायात खुरखुरिया लिक्क सामूहिक बलात्कार याःगु उजुरी लाःगु जिल्ला प्रहरी ज्याकुथि कैलालीया प्रवक्ता प्रहरी नायव उपरीक्षक दक्ष बस्नेतं जानकारी ब्यूगु दु ।

प्रहरी नायव उपरीक्षक बस्नेतया कथं बलात्कृत मिसामचां थःत कुटपिट यानाः बलात्कार याःगु बयान ब्यूगु दु ।

घटनाय् दुथ्याःगु द्वपनय् प्यम्हेसित नियन्त्रणय् काःगु दु । ज्वःगु ल्वाभः व मोटरसाइकलिसें गिरफ्तारीइ लाःपिं इपिंमध्ये निम्ह २० दँया व निम्ह छसिंकथं २१ दँ व २४ दँया जूगु प्रहरी प्रवक्ता बस्नेतं जानकारी ब्यूगु दु ।

Categorized in दुर्घटना-अपराध