नेवा: अनलाइन न्युज – ललेन्द्र शाक्य | २०७८ चैत्र १३, आइतबार ११:५८:३९

अफगानिस्तानय् मिसापिन्त नं स्कूलय् अध्ययन अध्यापनया व्यवस्था यायेमाःगु माग यासें प्रदर्शन याःगु दु ।

अफगानिस्तानया राजधानी काबुलय् थ्यंमथ्यं निगू दर्जन मिसापिन्सं ‘स्कूल चायेकी’ धैगु माग यासें शनिवाः प्रदर्शन याःगु खः ।

स्कूलय् ब्वनेगु व ब्वंकेगु थःपिनिगु आधारभूत अधिकार जूगुलिं स्कूल वनेदइगु व्यवस्था यायेमाःगु प्रदर्शनकारी मिसापिनिगु माग दु ।

अफगानिस्तानय् तत्कालीन तालिवान विद्रोहीपिन्सं सत्ता कब्जा यायेधुंकाः मिसापिन्त अध्ययन अध्यापन व रोजगारी लिसेंया ज्याय् सहभागी जुइमदइगु घोषणा याःगु खः ।

सरकारया उगु घोषणाप्रति हलिंन्यंकं आलोचना जूगु खःसा मिसापिन्त अध्ययन अध्यापन व रोजगारीइ बञ्चित यायेगु निर्णय भिंकेत दबाब लाःगु खः । तर तालिवानी उच्च अधिकारीपिन्सं धाःसा उगु इलंनिसें हे छुं ईया नितिं जक थुज्वःगु व्यवस्था याःगु व याकनं हे मिसापिन्त नं अध्ययन अध्यापन याकेबिइगु प्रतिबद्धता प्वंकूसें वयाच्वंगु खः ।

प्रतिबद्धता कथं तालिवान सरकारं वंगु वाःनिसें मिसापिन्त स्कूल छ्वयेगु निर्णय याःगु खः । तर स्कूल खुल्ला जुइगु छुं घौ न्ह्यः सरकारं निर्णय फातापुइकाः आःतक नं मिसापिन्त स्कूल वनेमदइगु व्यवस्था कायम हे तःगु दु ।

थ्वहे २३ मार्चनिसें मिसापिन्त स्कूल छ्वयेगु निर्णयपाखें लयेताःपिं मिसापिं व अधिकारवादी फुक्क आः हाकनं निरास जूगु दु । तालिवानी अधिकारीपिनिगु तत्कालीन प्रतिबद्धताया आधारय् गुलिखे मुलुक अफगानिस्तानप्रति नरम नं जुजुं वःगु दु । तर आः स्कूलय् मिसापिन्त छ्वयेगु निर्णय कार्यान्वयन मयायेधुंकाः धाःसा हलिंन्यंकंपाखें चिन्ता व च्यूताः प्वंकूगु दु ।

स्कूल वनेगु थःपिनिगु आधारभूत मानवअधिकार जूगुलिं थुकियात राजनीतिक रुपं कायेमज्यूगु प्रदर्शनकारीपिनिगु धापू दु ।

जिमित स्कूल वंके ब्यु, जिमित न्याय ब्यु थेंजाःगु माग तयाः प्रदर्शनकारीपिन्सं काबुलय् याःगु प्रदर्शनयात अन्तर्राष्ट्रिय संचार माध्यमं अतिकं महत्व ब्यूगु दु । इमिगु आन्दोलनप्रति अधिकारवादी संघसंस्था व निकायं नं ऐक्यबद्धता प्वंकूगु दु ।

Categorized in अन्तर्राष्ट्रिय